ផ្អែកតាមការលើកឡើងរបស់លោក Hakan Samuelsson នាយកប្រតិបត្តិក្រុមហ៊ុន Volvo បានឲ្យដឹងថាក្រុមហ៊ុនបានដាក់គោលដៅចង់ក្លាយជាម៉ាកដែលផលិតតែរថយន្តអគ្គិសនីសុទ្ធនៅក្នុងរយៈពេល១០ឆ្នាំទៀត។
Volvo ធ្លាប់បាននិយាយអំពីគោលដៅមួយរបស់ខ្លួនគឺចង់ឲ្យរថយន្តដែលលក់ចេញលើទីផ្សារសកល មានពាក់កណ្ដាលគឺជារថយន្តដែលប្រើប្រាស់អគ្គិសនីសុទ្ធ ដែលចង់សម្រេចឲ្យបានត្រឹមឆ្នាំ ២០២៥។ ប៉ុន្តែពេលនោះក្រុមហ៊ុនមិនបានប្រាប់អំពីពេលវេលាបញ្ឈប់ការផលិតរថយន្តដើរដោយចំហេះប្រេងឥន្ធនៈនោះទេ។
យ៉ាងណាក្ដីលោក Hakan ទើបបាននិយាយប្រាប់សារព័ត៌មាន Financial Times កាលពីថ្មីៗនេះថាខ្លួននឹងប្ដេជ្ញាប្រែមុខមាត់ទៅជាក្រុមហ៊ុនផលិតរថយន្តអគ្គិសនីសុទ្ធឲ្យបានត្រឹមឆ្នាំ ២០៣០។ គួរដឹងថាបច្ចុប្បន្ននេះក្នុងចំណោមរថយន្តជាច្រើនម៉ូដែលដែលលក់លើទីផ្សារ Volvo មានរថយន្តប្រើថាមពលអគ្គិសនីសុទ្ធត្រឹមមួយម៉ូដែលប៉ុណ្ណោះគឺម៉ូដែល XC40 Recharge៕
