ក្រុមហ៊ុន Dongfeng បានបើកលក់មុននូវរថយន្ត MPV Voyah Dream 2026 ផ្ដល់ជូនជាមួយជម្រើសម៉ូឌែលប្រើអគ្គិសនីលាយសាំង (PHEV) និងប្រើអគ្គិសនីសុទ្ធ (BEV) ជាមួយតម្លៃចន្លោះពី ៥៤ ៥០០ ទៅ ៦៤ ៣០០ ដុល្លារ។ ចំពោះម៉ូឌែលឆ្នាំ២០២៦ នេះចំណុចដែលគួរឲ្យចាប់អារម្មណ៍រថយន្ដបានអាគុយកាន់តែធំទំហំ ៦២.៥ kWh, ប្រព័ន្ធសាកថ្ម 800V និងការសាកថ្មលឿនកម្រិត 5C សម្រា់ម៉ូឌែលប្រើអគ្គិសនីលាយសាំង (PHEV) ប្រើអគ្គិសនីសុទ្ធបើកបានចម្ងាយ ៣៥០គីឡូម៉ែត្រ គិតស្ដង់ដារវាស់ចម្ងាយ CLTC ខណៈប្រើអគ្គិសនីលាយសាំងអាចបើកបានចម្ងាយ ១ ៥៣០ គីឡូម៉ែត្រ។ ចំណែកឯម៉ូឌែលប្រើអគ្គិសនីសុទ្ធ (BEV) សាកថ្មមួយពេញបើកបានចម្ងាយ ៧០០គីឡូម៉ែត្រ គិតតាមស្ដង់ដារវាស់ចម្ងាយ CLTC។ សម្រាប់ការដាក់លក់ជាផ្លូវការនឹងធ្វើឡើងនៅខែកញ្ញាខាងមុខនេះ។
អ្វីដែលពិសេសក្នុងរយៈពេលមួយម៉ោងបន្ទាប់ពីការចាប់ផ្តើមបើកទទួលការបញ្ជាទិញទុកមុន រថយន្ដនេះទទួលការកក់ដល់ទៅចំនួន ១០ ០០០ គ្រឿង។ រូបរាងរបស់រថយន្ត Voyah Dream ឆ្នាំ 2026 នៅតែស្រដៀងនឹងម៉ូឌែលដែលកំពុងលក់បច្ចុប្បន្ន ដោយរក្សាបាននូវប៉ាណាខាងមុខរចនាបថទឹកធ្លាក់ (waterfall-style front grille) ដ៏ធំនិងការតុបតែងដោយក្រូមនៅជុំវិញផ្នែកខាងក្រៅ។ ប៉ុន្ដែអ្វីដែលថ្មីមួយទៀតគឺរថយន្ដនេះបានបន្ថែមមកជាមួយពណ៌ខាងក្រៅមួយទៀតគឺ “Golden Red”។
ចំណុចដែលលេចធ្លោមួយទៀត Voyah Dream ស៊េរីឆ្នាំ២០២៦ បានបំពាក់មកជាមួយប្រព័ន្ធបត់កង់ក្រោយឆ្លាតវៃអាចគាំទ្រមុំបង្វិលអតិបរមា ៥° និងមុខងារបត់ដូចរថក្រោះ (tank turns)។ ចំពោះប្រព័ន្ធជំនួយការបើកបរក៏កាន់តែទំនើប រថយន្តនេះបំពាក់នូវប្រព័ន្ធ Huawei Qiankun ADS 4.0 គាំទ្រដោយសេនស័រចំនួន ២៧គ្រាប់ រួមទាំង LiDAR ប្រភេទ ១៩២-line និងរ៉ាដា 4D millimeter-wave លើកមុខងារបើកបរស្វ័យប្រវត្តិ (NOA) ក្នុងទីក្រុង និងលើផ្លូវហាយវេ រួមទាំងមុខងារជំនួយពេលចូូលចតផងដែរ។ បើធៀបនឹងប្រព័ន្ធ ADS 3.0 ជំនាន់មុន ការចាប់ហ្វ្រាំងខ្លាំងត្រូវបានកាត់បន្ថយ ៣០% នេះបើយោងតាមការអះអាងរបស់ក្រុមហ៊ុន។
នៅក្នុងកាប៊ីន (cabin) ត្រូវបានបំពាក់អេក្រង់បញ្ជាកណ្តាលទំហំ ១៥.៦ អុីញ បន្ថែមកជាមួយមុខងារ AR-HUD ទំហំ ២៩ អុីញ, អេក្រង់កម្សាន្តភ្ជាប់នៅពិដានខាងក្រោយទំហំ ១៧.៣ អុីញនិងភ្ជាប់មកជាមួយទូទឹកកកទំហំ ១៣ លីត្រមួយក៏ត្រូវបានបង្កប់នៅក្នុងកុងសូលកណ្តាលផងដែ។ ប្រព័ន្ធបញ្ជានៅផ្នែកខាងក្នុងរថយន្ដនេះដំណើរការដោយប្រព័ន្ធ HarmonySpace 5 របស់ក្រុមហ៊ុន Huawei។ សម្រាប់កៅអីនៅជួរទី២ ក៏បំពាក់មកជាមួយមុខងារ zero-gravity, មុខងារម៉ាស្សាចំនួន ២៦ចំណុចគ្របដណ្តប់លើកញ្ចឹងក, ស្មា, ចង្កេះ, ត្រគាកនិងជើង៕
