នៅថ្ងៃទី ២៣ ខែធ្នូ ក្រុមហ៊ុន Qiji Energy របស់ CATL បានដាក់សម្ពោធខ្សែផ្លូវ សម្រាប់ផ្លាស់ប្តូរអាគុយរថយន្តដឹកទំនិញធុនធ្ងន់ដែលមានចម្ងាយវែងជាងគេបំផុតរបស់ខ្លួន ដោយលាតសន្ធឹងចម្ងាយ ១ ២៥០ គីឡូម៉ែត្រ នៅលើកំណាត់ផ្លូវ ស៊ីឈួន-ឆុងឈីង-ហ៊ូប៉ី (Sichuan-Chongqing-Hubei) នៃផ្លូវល្បឿនលឿនសៀងហៃ-ឆឹងទូ (Shanghai-Chengdu Expressway) នៅក្នុងប្រទេសចិន។
ក្រុមហ៊ុន Qiji Energy ជាបុត្រសម្ព័ន្ធរបស់ក្រុមហ៊ុន CATL ផ្ដោតសំខាន់លើដំណោះស្រាយផ្លាស់ប្តូរអាគុយសម្រាប់រថយន្តដឹកទំនិញធុនធ្ងន់។ អ្នកតំណាងផ្លូវការរបស់ក្រុមហ៊ុនបានអះអាងថា ស្ថានីយផ្លាស់ប្តូរអាគុយរបស់ខ្លួន អាចប្រើប្រាស់បានជាមួយម៉ូឌែលរថយន្តដឹកទំនិញធុនធ្ងន់ទូទៅនៅលើទីផ្សារលើសពី ៩៥% ដែលអនុញ្ញាតឲ្យរថយន្តម៉ាកខុសៗគ្នា អាចឈប់ផ្លាស់ប្តូរអាគុយបានប្រើពេលប្រហែលត្រឹមតែ ៥ នាទីប៉ុណ្ណោះ។
ទន្ទឹមគ្នានេះយោងតាមការលើកឡើងរបស់ក្រុមហ៊ុន CATL បានឲ្យដឹងថា ក្រោមគំរូនៃការផ្លាស់ប្តូរអាគុយនេះ រថយន្តដឹកទំនិញនីមួយៗអាចសន្សំសំចៃថ្លៃដើមប្រតិបត្តិការបានចាប់ពី ៣០ ០០០ ដល់ ៦០ ០០០ យ័ន ឬស្មើនិងប្រមាណពី ៤ ៣០០ ដល់ ៨ ៥០០ ដុល្លារ ក្នុងមួយឆ្នាំ និងជួយកាត់បន្ថយការបំភាយឧស្ម័នកាបូន។ បើផ្អែកលើរថយន្តដឹកទំនិញធុនធ្ងន់បែបប្រពៃណី (ប្រើសាំង/ម៉ាស៊ូត) គិតជាមធ្យមក្នុងការធ្វើដំណើរចម្ងាយ ២០០ ០០០ គីឡូម៉ែត្រក្នុងមួយឆ្នាំ ជាមួយនឹងកម្រិតស៊ីប្រេង ៣៣ លីត្រ/១០០ គីឡូម៉ែត្រ ការបំភាយឧស្ម័នកាបូនក្នុងរថយន្តមួយគ្រឿងមានចំនួនដល់ទៅ ១៧៤ តោន ដែលចំនួននេះស្មើនឹងបរិមាណឧស្ម័នកាបូនិកសរុបដែលស្រូបយកដោយដើមឈើចំនួន ៩ ៦៤៣ ដើម ក្នុងរយៈពេលមួយឆ្នាំ។
កន្លងមក លោក Zhang Kai ប្រធានផ្នែកបច្ចេកវិទ្យានៃអាជីវកម្មផ្លាស់ប្តូរអាគុយរបស់ CATL បានចែករំលែកថា អាជីវកម្មនេះនឹងត្រូវបានជំរុញតាមរយៈពីរដំណាក់កាល៖ ដំបូងគឺទីផ្សារ To B (លក់ជូនអាជីវកម្ម) និងបន្ទាប់មកពង្រីកទៅកាន់ទីផ្សារ To C (លក់ជូនអ្នកប្រើប្រាស់ទូទៅ)។ លោកបានបញ្ជាក់បន្ថែមថា៖«សម្រាប់សេវាកម្មផ្លាស់ប្តូរអាគុយ ទីផ្សារ To B គឺជាទីផ្សារដែលចាស់ទុំ និងមានតម្រូវការច្បាស់លាស់ ចំណែកឯ To C គឺជាដំណើរការដ៏សំខាន់សម្រាប់ CATL ក្នុងការទទួលបានមតិកែលម្អពីអ្នកប្រើប្រាស់យ៉ាងឆាប់រហ័ស និងដើម្បីកសាងការទទួលស្គាល់ម៉ាកយីហោ»។
នៅត្រឹមឆ្នាំ ២០៣០ ក្រុមហ៊ុន Qiji Energy គ្រោងនឹងសាងសង់បណ្តាញស្ថានីយផ្លាស់ប្តូរអាគុយនៅទូទាំងប្រទេស ដែលមានចម្ងាយសរុបប្រហែល ១៨០ ០០០ គីឡូម៉ែត្រ ដោយគ្របដណ្តប់លើ ៨០% នៃសមត្ថភាពដឹកជញ្ជូនទំនិញតាមរថយន្តដឹកទំនិញក្នុងប្រទេសចិន និងតភ្ជាប់បណ្តុំទីក្រុងសំខាន់ៗចំនួន ១៦។
នៅក្នុងខែវិច្ឆិកា ការលក់រថយន្តដឹកទំនិញធុនធ្ងន់នៅក្នុងប្រទេសចិនបានកើនឡើងដល់ ១១៣ ០០០ គ្រឿង ដែលជាការកើនឡើង ៦៥.៤% បើធៀបនឹងរយៈពេលដូចគ្នាកាលពីឆ្នាំមុន ហើយនេះជាការកើនឡើងក្នុងរយៈពេល ៨ ខែជាប់ៗគ្នា។ ក្នុងនោះមានរថយន្តដឹកទំនិញធុនធ្ងន់ដែលប្រើថាមពលថ្មី (New Energy) ចំនួន ២៨ ០០០ គ្រឿង កើនឡើង ១៧៨% បើធៀបនឹងឆ្នាំមុន ហើយអត្រានៃការជ្រាបចូលទីផ្សារ (Penetration rate) បានកើនលើសពី ៣០% ជាលើកដំបូងបង្អស់។
ការលក់រថយន្តដឹកទំនិញធុនធ្ងន់ដែលប្រើថាមពលថ្មី (New Energy) ក្នុងរយៈពេល ៣ ត្រីមាសដំបូង ក៏បានកើនឡើង ១៨៤% ផងដែរ បើធៀបនឹងរយៈពេលដូចគ្នាកាលពីឆ្នាំមុន។ ចាប់ពីខែមករា ដល់ខែវិច្ឆិកា ការលក់សរុបបង្គរនៃរថយន្តដឹកទំនិញធុនធ្ងន់ថាមពលថ្មី មានចំនួន ១៨៧,០០០ គ្រឿង ដែលឆ្លុះបញ្ចាំងឱ្យឃើញពីអត្រានៃការជ្រាបចូលទីផ្សារចំនួន ២៥.៩៥% (ធៀបនឹងឆ្នាំមុន ដែលមានត្រឹមតែ ១២.៥៤% ក្នុងរយៈពេលដូចគ្នា៕
