ជាមួយនឹងកង្ខះបន្ទះឈីបអេឡិចត្រូនិច និង ការពន្យាពេលផលិតកម្ម ដែលមិនទាន់បានដោះស្រាយចេញ ឧស្សាហកម្មយានយន្តកំពុងតែតស៊ូធ្វើយ៉ាងណាឲ្យតាមទាន់តម្រូវការរបស់អតិថិជន។
ក្នុងករណីជាច្រើន វាបានធ្វើឲ្យឈ្មួញកណ្តាលលក់រថយន្តឡើងថ្លៃ ដែលគេធ្លាប់បានឃើញលើរថយន្ត Ford Bronco និង GMC Hummer EV ហើយឥឡូវនេះ វាក៏កើតឡើងលើរថយន្តអគ្គិសនី Cadillac Lyriq ទៀតផង។
រថយន្តអគ្គិសនីថ្មីសន្លាងរបស់ Cadillac ខាងលើ ទើបតែបានចូលសង្វាក់ផលិតកម្មនាពេលថ្មីៗនេះ ហើយតម្រូវការក៏បានកើនឡើងខ្លាំង ដែលជាមូលហេតុធ្វើឲ្យឈ្មួញដំឡើងតម្លៃរបស់វាតែម្តង។
គួររំលឹកឲ្យដឹងថា នៅពេលបើកឲ្យបញ្ជាទិញរថយន្ត Cadillac Lyriq ដំបូង វាមានតម្លៃចាប់ពី ៥៩ ៩៩០ដុល្លារ សម្រាប់ទីផ្សារសហរដ្ឋអាមេរិក ប៉ុន្តែពេលនេះឈ្មួញបានទាមទារ ៥ ០០០ដុល្លារបន្ថែមពីលើនោះទៀត។
រថយន្ត Cadillac Lyriq ឆ្នាំ២០២៣ មានបំពាក់កញ្ចប់អាគុយអគ្គិសនីទំហំ ១០០គីឡូវ៉ាត់ម៉ោង ក៏ដូចជា ម៉ូទ័រអគ្គិសនី មានកម្លាំង ៣៤០សេះ និងកម្លាំងរមួល ៤៤០ញ៉ូតុនម៉ែត្រ ដែលអនុញ្ញាតឲ្យវាអាចរត់បានចម្ងាយ ៥០២គីឡូម៉ែត្រក្នុងមួយម៉ោង នៅពេលសាកភ្លើងពេញម្តង។
ខណៈពេលដែល Lyriq ចេញលក់ដំបូងជាប្រភេទប៉ុងមួយ វាក៏នឹងមានជម្រើសប៉ុងពីរដែរ នៅដើមឆ្នាំ២០២៣ ជាមួយនឹងតម្លៃចាប់ពី ៦៤ ៩៩០ដុល្លារ។ ទោះបីជាយ៉ាងណាក៏ដោយ បើយោងតាមប្រភពព័ត៌មានបានឲ្យដឹងថា Cadillac Lyriq ឆ្នាំ២០២៣ ប្រភេទប៉ុងពីរ នឹងប្រើម៉ូទ័រអគ្គិសនីចំនួន ២ ហើយមានកម្លាំងសរុប ៥០០សេះ៕
