ក្រុមហ៊ុន Toyota បានបញ្ជាក់ជាផ្លូវការថារថយន្ត Corolla Cross នឹងត្រូវដាក់លក់នៅតំបន់អឺរ៉ុប ដោយការដឹកជញ្ជូនសម្រាប់ទីផ្សារចក្រភពអង់គ្លេសនឹងត្រូវចាប់ផ្ដើមនៅអំឡុងចុងឆ្នាំក្រោយនេះ។
Corolla Cross ដែលនឹងដាក់លក់នៅអឺរ៉ុប គឺមានលក្ខណៈស្រដៀងនឹង Corolla Cross ដែលលក់នៅសហរដ្ឋអាមេរិកដែរ ប៉ុន្តែរថយន្តដែលទើបតែបង្ហាញថ្មីនេះមានអំពូលភ្លើងមុខប្លែក អមជាមួយការឌីហ្សាញអំពូលក្រោយពិសេសជាងមុនបន្តិចផងដែរ។
Corolla Cross នេះនឹងប្រើប្រាស់ប្រព័ន្ធ Hybrid ជំនាន់ទីប្រាំដែលសន្យាថានឹងផ្ដល់ជូនសមត្ថភាពសន្សំសំចៃប្រេងល្អបំផុត ដោយវាប្រើម៉ាស៊ីន៤ស៊ីឡាំង ចំណុះ២,០លីត្រ អមជាមួយម៉ូទ័រអគ្គិសនីមួយដែលផលិតកម្លាំងបាន ១៩៦សេះ។ រថយន្តនេះក៏មានជម្រើសប្រើម៉ូទ័រអគ្គិសនីពីរផងដែរ ដោយប្រើប្រព័ន្ធបើកបរប៉ុងពីរ។
ចំពោះតម្លៃលក់នៅមិនទាន់បានប្រកាសចេញនៅឡើយទេ ប៉ុន្តែទំនងជាមានតម្លៃក្រោមខ្ទង់ ៣ម៉ឺនផោន ដើម្បីអាចស្ថិតនៅចន្លោះរថយន្ត C-HR និងរថយន្ត RAV4៕
