ក្រុមហ៊ុន BMW ទើបតែបានប្រកាសចេញរថយន្តម៉ូដែលពិសេសថ្មីមួយទៀត សម្រាប់ទីផ្សារប្រទេសជប៉ុន គឺ BMW X7 Nishijin Edition។
រថយន្ត BMW X7 Nishijin Edition ឆ្នាំ២០២២ នេះ មានពណ៌ពិសេស ហៅថា Ametrine ពី BMW Individual។ វាត្រូវបានបំផុសគំនិតដោយត្បូងមានតម្លៃ ហើយត្រូវបានបង្កើតឡើងតាមរយៈការលាយបញ្ចូលគ្នានូវ ស្រមោលពណ៌ស្វាយ Amethyst និង ពណ៌លឿង Citrine ដែលមានស្រាប់របស់ BMW។ ជាលទ្ធផល វាបង្កើតបានជាពណ៌ស្វាយ ដែលធ្វើឲ្យ Nishijin Edition លេចធ្លោខ្លាំងខុសពីម៉ូដែល X7 ធម្មតា។
ចំណែកឯកាប៊ីនខាងក្នុងវិញ ក៏កាន់តែពិសេសដែរ។ ម៉ូដែលនេះទទួលបានឈ្មោះពី Nishijin-ori ដែលជាវាយនភ័ណ្ឌប្រពៃណី ត្រូវបានផលិតនៅក្នុងស្រុក Nishijin នៃខេត្ត Kamigyō-ku ក្នុងទីក្រុង Kyoto ប្រទេសជប៉ុន។ កាប៊ីនរបស់វាត្រូវបានបំពាក់ដោយវាយនភ័ណ្ឌពិសេស ដែលមានលំនាំស្មុគស្មាញ។ វាបបានបន្តតុបតែងលើប្លុកបញ្ជាផ្នែកកណ្តាល, តាប្លូ និង ផ្នែកខាងលើនៃ X7 Nishijin Edition ផងដែរ។
BMW បានបង្ហាញថា រថយន្ត X7 Nishijin Edition នឹងត្រូវផលិតត្រឹមតែ ៣គ្រឿងប៉ុណ្ណោះ ជាមួយនឹងតម្លៃចាប់ពី ១៦,៨លានយ៉េន ឬ ១៥៣ ០០០ដុល្លារ សម្រាប់ទីផ្សារប្រទេសជប៉ុន។ វាត្រូវបានផលិតផ្អែកតាមម៉ូដែល 40d xDrive ដោយប្រើម៉ាស៊ីនម៉ាស៊ូតចំណុះ ៣,០លីត្រ turbo ទំហំ ៦ស៊ីឡាំង មានកម្ឡាំង ៣៣៥សេះ និងកម្លាំងរមួល ៧០០ញ៉ូតុនម៉ែត្រ៕
