ត្បិតថាមិនទាន់ចេញលក់លើទីផ្សារ ប៉ុន្តែមាន YouTuber មួយចំនួនមានឱកាសបានឃើញរថយន្ត Hummer អគ្គិសនីផ្ទាល់ៗភ្នែកតែម្ដង។
ក្នុងវីដេអូថ្មីមួយបង្ហោះដោយ Speed Phenom បានបង្ហាញឲ្យឃើញអំពីរូបរាងដ៏ច្បាស់របស់រថយន្តភីកអាប់អគ្គិសនី Hummer ដែលមានរូបរាងស្រស់ស្អាតខ្លាំងមិនធម្មតា ហើយនៅផ្នែកខាងក្នុងក៏មានលក្ខណៈទំនើប មើលទៅប្រៀបដូចជារថយន្តអនាគតយ៉ាងអ៊ីចឹង។
រថយន្ត Hummer អគ្គិសនីដែលបង្ហាញក្នុងវីដេអូគឺជាប្រភេទ Hummer EV Edition 1 ដែលវានឹងចេញលក់លើទីផ្សារមុនគេ ចាប់ផ្ដើមពីអំឡុងឆ្នាំ ២០២១ តទៅ។ តម្លៃសម្រាប់រថយន្តប្រភេទនេះគឺមានចាប់ពី ១១២ ៥៩៥ដុល្លារឡើងទៅ។
Hummer EV Edition 1 មានបំពាក់ម៉ូទ័រអគ្គិសនីចំនួនបី ដែលផលិតកម្លាំងបានសរុប ១០០០សេះ។ ក្រុមហ៊ុន GMC មិនបានប្រាប់អំពីចំណុះអាគុយនៅឡើយទេ ប៉ុន្តែនិយាយថាវាអាចឲ្យរថយន្តរត់បានចម្ងាយ ៥៦៣គីឡូម៉ែត្រ និងអាចស្ទុះពី ០-៩៦គ.ម/ម៉ ក្នុងពេលត្រឹម ៣វិនាទី៕
