ទោះបីជាចេញមក ៨ ឆ្នាំហើយក្ដី រថយន្ត Lamborghini Aventador នៅតែជាទីចាប់អារម្មណ៍របស់អ្នកស្នេហារថយន្ត ដោយសារតែរូបរាងដ៏ទាក់ទាញរបស់វា។ អ្នកជំនាញរូបវិទ្យាម្នាក់ឈ្មោះ Sterling Backus ស្រឡាញ់រថយន្តនេះពេក ក៏សម្រេចផលិតវាដោយប្រើម៉ាស៊ីនព្រីន 3D ជាមួយកូនប្រុស ក្នុងពេលទំនេរពីការងារ។
ឪពុកកូនពីររូបនេះ បានចំណាយពេលជិត ១ ឆ្នាំកន្លះមកហើយ លើការផលិតរថយន្តនេះ ដោយប្រើពេលប្រមាណ ១ ម៉ោងក្នុងមួយថ្ងៃ ហើយបានបណ្ដាក់ទុនអស់ ២០ ០០០ ដុល្លារផងដែរ គិតមកទល់ពេលនេះ។
គំនិតនៃការផលិតរថយន្តដោយប្រើម៉ាស៊ីនព្រីននេះ កើតមាននៅពេលដែលលោក Sterling និងកូនប្រុសខ្លួនលេងហ្គេម Forza Horizon 3 ពេលដែលកូនប្រុសសួរឪពុកថា ពួកគេអាចផលិតរថយន្តបានឬអត់។
តួខ្លួនរថយន្តផលិតដោយប្រើម៉ាស៊ីនព្រីន 3D សារធាតុប្លាស្ទិក ២០០ ដុំ លើកលែងតែផ្នែកដូចជាគ្រោងឆ្អឹង, ស្ពឺ, ម៉ាស៊ីន និងផ្នែកគ្រឿងយន្តមួយចំនួន។ សូម្បីតែអំពូលភ្លើងមុខ, កំពូលភ្លើងស៊ីញ៉ូ, រន្ធខ្យល់ និងគ្រឿងបរិក្ខារខាងក្នុងផ្សេងទៀតសុទ្ធតែជាការព្រីន 3D ដែលប្រើសារធាតុសរសៃកាបូន។
និយាយពីម៉ាស៊ីន ច្បាស់ណាស់ថាមិនមែនជាម៉ាស៊ីន ១២ ស៊ីឡាំង ចំណុះ ៦,៥ លីត្រ ដូចនៅលើ Aventador មែនទែននោះទេ ដោយសារតែវាមានតម្លៃថ្លៃហើយក៏ពិបាករកទិញទៀតផង។ ជំនួសមកវិញ គឺគេប្រើម៉ាស៊ីន ចំណុះ ៥,៧ លីត្រ បានពីរថយន្ត Chevy Corvette ស៊េរីឆ្នាំ ២០០៣ បំពាក់ជាមួយ Twin-Turbo។
ក្នុងបទសម្ភាសន៍ជាមួយទស្សនាវដ្ដីអូស្ត្រាលី Which Car លោក Sterling និយាយថា ៖ “នៅសល់ដំណើរវែងឆ្ងាយទៀត ដើម្បីបញ្ចប់ការផលិតរថយន្ត។ មានបញ្ហាខ្លះតាមផ្លូវ ប៉ុន្តែដំណើរមួយនេះ ពោរពេញដោយការសប្បាយ”៕
