[ទីផ្សារបរទេស] ក្រុមហ៊ុន SAIC Motor-CP Co., Ltd. និង MG Sales (Thailand) Co., Ltd. ដែលជាក្រុមហ៊ុនផលិត និងចែកចាយរថយន្ត MG នៅប្រទេសថៃ បានធ្វើការប្រកាសថា រថយន្តអគ្គិសនី MG ទាំងម៉ូដែល NEW MG ZS EV និង MG EP បានទទួលការពេញនិយមកាន់តែខ្លាំងបន្ទាប់ពីការប្រកាសកាត់បន្ថយតម្លៃតាមវិធានការគាំទ្ររបស់រដ្ឋាភិបាលប្រហែលពី ៦ ៨០៤ ដុល្លារ ទៅ ៧ ៣៧៤ ដុល្លារ ។
ជាមួយគ្នានេះ ក្នុងរយៈពេលមួយសប្តាហ៍បន្ទាប់ពីការប្រកាសតម្លៃជាផ្លូវការនៅឯពិរព័ណ៍ Bangkok International Motor Show ទទួលបានការកក់ទុកមុនជាង ៣,០០០ គ្រឿង ហើយ MG នឹងចាប់ផ្តើមចែកចាយរថយន្តដល់អតិថិជនចាប់ពីខែឧសភាតទៅ។
គួរឲ្យដឹងថា MG នឹងចាប់ផ្តើមចែកចាយរថយន្តអគ្គិសនីទាំងពីរចាប់ពីខែឧសភានេះតទៅ ប៉ុន្តែដោយសារចំនួននៃការកក់លើសពីការរំពឹងទុក ដូច្នេះ អតិថិជនដែលកក់ឥឡូវអាចនឹងទទួលបានរថយន្តនៅត្រីមាសចុងក្រោយនៃឆ្នាំនេះ។
សម្រាប់រថយន្តអគ្គិសនី MG ZS EV ថ្មី មានបំពាក់ជាមួយម៉ូទ័អគ្គិសនីដែលមានកម្លាំង ១៧៧ សេះ ភ្ជាប់ជាមួយអាគុយទំហំ ៥០,៣គីឡូវ៉ាត់ម៉ោង អាចបើកបរបានចម្ងាយ ៤០៣ គីឡូម៉ែត្រ ក្នុងការសាកថ្មម្តង និងមានមានលក់ជាពីរម៉ូដែលគឺ NEW MG ZS EV Model D និង Model X មានតម្លៃ ២៨ ៤៣៤ ដុល្លារ និង ៣០ ៦៥១ ដុល្លារ បន្ទាប់ពីជំនួយពីរដ្ឋាភិបាល។
រីឯរថយន្ត MG EP ជារថយន្តអគ្គីសនីសុទ្ធដំបូងគេក្នុងប្រទេសថៃ បំពាក់ជាមួយមូទ័រអគ្គិសនីដែលមានកម្លាំង ១៦៣ សេះ ភ្ជាប់ជាមួយអាគុយទំហំ ៥០,៣ គីឡូវ៉ាត់ម៉ោង អាចបើកបរបានចម្ងាយ ៣៨០ គីឡូម៉ែត្រ។ ក្នុងនោះរថយន្តអគ្គិសនីសុទ្ធនឹងមានលក់ជាពីរម៉ូដែល គឺ MG EP និង MG EP PLUS មានតម្លៃ ២២ ៨០១ ដុល្លារ និង ២៣ ១០១ ដុល្លារ បន្ទាប់ពីជំនួយពីរដ្ឋាភិបាល៕
