រថយន្ដ SUV បែប Off-Road Ford Bronco ម៉ូឌែលថ្មី ស៊េរីឆ្នាំ ២០២៧ បានបង្ហាញវត្ដមានជាផ្លូវការ ភ្ជាប់មកជាមួយការរចនាស្អាតប្លែក ដើម្បីតម្រូវចិត្តយុវវ័យជំនាន់ក្រោយ។ តាមការំពឹងទុក រថយន្តនេះត្រូវបានគេប៉ាន់ស្មានថា នឹងមានតម្លៃចាប់ផ្តើមខ្ទង់ ៥២ ០០០ ដុល្លារ។ សម្រាប់អតិថិជនអាចធ្វើការបញ្ជាទិញរថយន្ដបាននៅខែតុលាខាងមុខនេះ ហើយការដាក់លក់ជាផ្លូវការនឹងចាប់ផ្តើមនៅខែមករាឆ្នាំក្រោយ។
សម្រាប់រថយន្ដ Ford Bronco RTR ដំណើរដោយម៉ាសុីនចំណុះ ២.៣ លីត្រ ទំហំ៤សុីឡាំង ដំណើរការដោយប្រអប់លេខស្វ័យប្រវត្តិ ១០ វគ្គ អាចផលិតកម្លាំងបា ៣៣០ សេះ កម្លាំងរមួល ៤៤១ ញូតុនម៉ែត្រ នេះបើយោងតាមការបញ្ជាក់ពីប្រធានវិស្វកររបស់ Bronco លោក Ed Krenz បានប្រាប់ទស្សនាវដ្តី MotorTrend ។
Ford Bronco RTR ប្រើប្រាស់កម្មវិធី anti-lag នៅក្នុងមុខងារ Baja (mode) ដើម្បីធានាថា Turbocharger របស់រថយន្ដនេះត្រៀមខ្លួនជានិច្ចក្នុងការជួយកែតម្រូវលំនឹងមុខក្រោយរបស់រថយន្ត នៅពេលបើកបរលើផ្លូវរលាក់ខ្លាំង ឬពេលហោះលោតខ្លាំងៗ។ នៅពេលអ្នកបើកបរដកជើងពីឈ្នាន់ហ្គាសក្នុងអំឡុងពេលប្រព័ន្ធ anti-lag កំពុងដំណើរការ ប្រព័ន្ធគ្រប់គ្រងម៉ាស៊ីននឹងកាត់ផ្តាច់ការផ្គត់ផ្គង់ប្រេង ប៉ុន្តែរក្សាសន្ទះខ្យល់ឲ្យនៅចំហ ដើម្បីឲ្យខ្យល់បន្តហូរឆ្លងកាត់ម៉ាស៊ីន និងបំពង់ស៊ីម៉ាំង សំដៅរក្សាល្បឿនវិលរបស់ Turbo ឲ្យនៅថេរ។
គ្រឿងបន្លាស់មួយចំនួនរបស់ Bronco RTR ត្រូវបានយកចេញពីរថយន្ដ Bronco Raptor ដូចជា កង្ហារត្រជាក់កម្លាំង ១ ០០០ វ៉ាត់ ជួយបឺតខ្យល់បន្ថែមទៅលើធុងទឹកដើម្បីរក្សាសីតុណ្ហភាពម៉ាស៊ីនឲ្យនៅដំណើរការបានល្អ ទោះបីជាត្រូវប្រើប្រាស់ក្នុងការបើកបរធ្ងន់ធ្ងរពេញមួយថ្ងៃនៅតំបន់វាលខ្សាច់ក៏ដោយ។ បន្ថែមពីនេះ គ្រឿងបង្គុំចង្កូត និងដៃឃ្លោង របស់ម៉ូឌែល Bronco Raptor ត្រូវបានបំពាក់មកលើរថយន្ដ Bronco RTR ដើម្បីជួយឲ្យរថយន្ដនេះ អាចទប់ទល់នឹងសម្ពាធនៃការបើកបរ Off-Road ខ្លាំងៗនិងការប៉ះទង្គិចធ្ងន់ៗ កើតមានជាញឹកញាប់ក្នុងការបើកបរលើផ្លូវថ្ម និងការរត់ក្នុងល្បឿនលឿនលើវាលខ្សាច់។
.jpg)
Bronco RTR ស៊េរីឆ្នាំ ២០២៧ នឹងត្រូវដាក់លក់ក្នុងជម្រើសពីរប្រភេទ។ ការរៀបចំតាមស្តង់ដារ រថយ្ដនេះប្រើប្រាស់ប្រព័ន្ធបូមខ្ពស់ (high-clearance suspension) Bilstein របស់ Ford និងសំបកកង់ (all-terrain) ទំហំ ៣៣ អុីញ ដែលជាការរួមបញ្ចូលគ្នាដែលមិនធ្លាប់មានពីមុនមកសម្រាប់រថយន្ត Bronco ចេញពីរោងចក្រ។ បន្ថែមពីនេះរថយន្ដនេះបំពាក់ជាមួយថាសកង់ RTR Evo 6 ទំហំ ១៧ អុីញ ប្រភេទអាចចាប់ខ្ចៅជាប់គែមបាន មានកម្រិត Offset ខ្ពស់ជាងមុន ជួយពង្រីកចម្ងាយរវាងកង់ឆ្វេងស្តាំរបស់ RTR រីកធំជាងមុនប្រហែល ២ អ៊ីញ ដូចទៅនឹងម៉ូឌែល Bronco បំពាក់មកជាមួយកញ្ចប់ Sasquatch។
សម្រាប់អ្នកចូលចិត្តបើកបរ off-road កម្រិតខ្ពស់ មានជម្រើសក្នុងការបន្ថែម កញ្ចប់ Sasquatch ទៅលើ RTR របស់ពួកគេ ដែលនឹងទទួលបានសំបកកង់ Goodyear Wrangler Territory RT ទំហំ ៣៥ អុីញ និងប្តូរមកប្រើប្រព័ន្ធបូម HOSS 3.0 របស់ Ford ជាមួយបញ្ចូលជាមួយបូម Fox internal-bypass វិញ៕
