វីរុសកូរ៉ូណាកំពុងផ្ទុះនៅប្រទេសចិន នឹងផ្ដល់ការគំរាមកំហែងរយៈពេលវែងដល់ឧស្សាហកម្មយានយន្តលើសកលលោក ដោយសារបញ្ហាទាក់ទងនឹងសង្វាក់ផលិតកម្ម និងការថយចុះនៃចំនួនលក់រថយន្ត។
មុនការផ្ទុះវីរុសកូរ៉ូណានេះ ចំនួនលក់រថយន្តនៅចិនបានធ្លាក់ចុះរយៈពេល ២ ឆ្នាំជាប់គ្នា ដោយសារកំណើនសេដ្ឋកិច្ចយឺត និងការបាត់បង់ការផ្ដល់អត្រាពន្ធពិសេសសម្រាប់រថយន្តអគ្គិសនី។ ចាប់តាំងពីវីរុសកាចសាហាវផ្ទុះមក រោងចក្រធំៗជាច្រើនត្រូវបានបញ្ជាឲ្យបិទបន្តរហូតដល់សប្ដាហ៍ក្រោយ ខណៈដែលរដ្ឋាភិបាលចិនកំពុងព្យាយាមគ្រប់គ្រងវីរុស។
S&P Global Ratings ជឿថាការផ្ទុះវីរុសនេះ នឹងបង្ខំឲ្យក្រុមហ៊ុនផលិតរថយន្តនៅអាស៊ី កាត់បន្ថយទំហំផលិតរថយន្តប្រមាណ ១៥% នៅក្នុងត្រីមាសទី ១ នេះ។ ក្រុមហ៊ុនដែលមានរោងចក្រនៅទីក្រុង Wuhan មានដូចជា General Motors, Nissan, Renault, Honda និង PSA Group ជាដើម។
Volkswagen រងការប្រឈមផងដែរ ដោយសារក្រុមហ៊ុនមានរោងចក្រចំនួន ២៤ ផលិតរថយន្ត ឬគ្រឿងបន្លាស់រថយន្តនៅចិន ដែលវាស្មើនឹងប្រមាណជាង ៤០% នៃទំហំផលិតសរុបទូទាំងពិភពលោករបស់ក្រុមហ៊ុន។ យ៉ាងណាក្ដីបច្ចុប្បន្ននេះក្រុមហ៊ុននិយាយថាផែនការផលិតរថយន្តឲ្យអតិថិជនមិនមានការផ្លាស់ប្ដូរនោះឡើយ។
ក្រុមហ៊ុនផ្គត់ផ្គង់គ្រឿងបន្លាស់រថយន្តក៏នឹងរងការខូចខាតផងដែរ មានដូចជា Bosch, Schaeffler, ZF Friedrichshafen, Faurecia និង Valeo ដែលសុទ្ធតែមានប្រតិបត្តិការនៅប្រទេសចិន។ ចំណែក Hyundai វិញបានផ្អាកសង្វាក់ផលិតកម្មរបស់ខ្លួននៅកូរ៉េខាងត្បូង ព្រោះវីរុសកូរ៉ូណាបានប៉ះពាល់ដល់ដៃគូផ្គត់ផ្គង់គ្រឿងបន្លាស់នៅចិន៕
