Daimler ក្រុមហ៊ុនមេរបស់ Mercesdes-Benz រួមជាមួយក្រុមហ៊ុន Bosh ទទួលបានការអនុញ្ញាតពីរដ្ឋាភិបាលនៅទីក្រុង Stuttgart ប្រទេសអាល្លឺម៉ង់ ដើម្បីសាកល្បងប្រព័ន្ធចំណងស្វ័យប្រវត្តិរបស់ខ្លួន។
ការសាកល្បងនឹងធ្វើឡើងនៅទីតាំងចំណងក្នុង Mercedes-Benz Museum ដែលមានបំពាក់ដោយ Sensor ដើម្បីនាំផ្លូវ និងត្រួតពិនិត្យរថយន្ត នៅពេលពួកវាចូលចតដោយខ្លួនឯង ដោយស្វ័យប្រវត្តិ។ ម្ចាស់រថយន្តគ្រាន់ចុចបញ្ជាលើកម្មវិធីទូរសព្ទ រួចបញ្ជូនរថយន្តរបស់ពួកគេ ទៅកាន់ទីតាំងចត និងអាចហៅរថយន្តមកវិញបាន តាមរយៈកម្មវិធីដដែល។ ដំណើរការចូលចតស្វ័យប្រវត្តិនេះ មិនត្រូវការមនុស្សបញ្ជានោះទេ។
ស្ដាប់ទៅដូចសាមញ្ញណាស់ ប៉ុន្តែដំណើរការទាំងមូលមិនងាយស្រួលនោះទេ។ ដើម្បីបង្កើតប្រព័ន្ធនេះបាន Bosch ត្រូវដំឡើង Sensor នៅគ្រប់ទីតាំងក្នុងចំណតរថយន្ត ដើម្បីផ្ដល់ព័ត៌មានសំខាន់ៗសម្រាប់នាំផ្លូវរថយន្ត។ នៅពេលរថយន្តជួបឧបសគ្គនៅលើផ្លូវ វានឹងឈប់ភ្លាមមួយរំពេច។ គួរដឹងថាប្រព័ន្ធចំណតស្វ័យប្រវត្តិនេះ បានផលិតឡើងតាំងពីឆ្នាំ ២០១៥ មកម្ល៉េះ៕
