[ព័ត៌មានក្នុងស្រុក] គណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការបង្កើតនូវគ្រុបតេលេក្រាម (Telegram Group) ឈ្មោះ”សុវត្ថិភាពចរាចរណ៍យើង OUR ROAD SAFETY” ជូនដល់សារធារណជនគ្រប់រូបក្នុងប្រើប្រាស់ដោយសេរី ក្នុងការផ្តល់ជូននូវព័ត៌មានអំពីស្ថានភាពចរាចរណ៍ផ្លូវគោកទាន់ហេតុការណ៍ បន្ថែមពីលើបណ្តាញសង្គម ឬកម្មវិធីមួយចំនួនទៀត ដែលគណៈកម្មាធិការជាតិមួយនេះកំពុងទំនាក់ទំនងជាមួយសាធារណជន សំដៅបង្ការទប់ស្កាត់កាត់បន្ថយគ្រោះថ្នាក់ និងបង្ការទប់ស្កាត់អំពើល្មើសច្បាប់ស្តីពីចរាចរណ៍ផ្លូវគោក ដែលមាននៅលើផ្លូវថ្នល់ នៃព្រះរាជាណាចក្រកម្ពុជា។
គួរបញ្ជាក់ផងដែរថា ការសម្រេចនៃការបង្កើតគ្រុបតេលេក្រាម (Telegram Group) ឈ្មោះ”សុវត្ថិភាពចរាចរណ៍យើង OUR ROAD SAFETY”នេះ ត្រូវបានអនុវត្តន៍ឡើង តាមអនុសាសន៍ណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ ៤៨ កាលពីថ្ងៃទី ៣ ខែមករា ឆ្នាំ ២០២២។
ក្នុងនោះដែរ ដើម្បីធានាបាននូវការផ្តល់ព័ត៌មានជាក់លាក់នៅក្នុងគ្រុបតេលេក្រាមនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការណែនាំដូចជា៖
- សូមផ្តល់ព័ត៌មាន ទីតាំង និងពេលវេលា នៃហេតុការណ៍ពិតប្រាកដ និងច្បាស់លាស់
- សូមផ្តល់រូបភាព ឬវីដេអូរខ្លីៗ នៃហេតុការណ៍ ពិតៗ ជាក់ស្តែង
- សូមផ្តល់ខ្លឹមសារព័ត៌មានដោយប្រកាន់ខ្ជាប់តាមក្រមសីលធម៌
- សូមកុំផ្តល់នូវព័ត៌មានក្លែងក្លាយ ឬព័ត៌មានដែលមានចរិកញុះញង់ មួលបង្កាច់ បង្ខូចកិត្តិយស និងសេចក្តីថ្លៃថ្នូររបស់អ្នកដតៃ ឬប្រើពាក្យពេចន៍អសុរុះ ឬរូបភាពអាសអាភាស ដែលអំពើទាំងនេះនឹងត្រូវផ្តន្ទាទោសតាមច្បាប់ជាធរមាន។
- សូមកុំផ្តល់ព័ត៌មាន ដែលខុសពីព័ត៌មានស្តីពីចរាចរណ៍ផ្លូវគោក។
បន្ថែមពីនេះ គណៈកម្មាធិការជាតិសុវត្ថិភាពចរាចរណ៍ផ្លូវគោកក៏អាចរាយការណ៍តាមរយៈកម្មវិធី «ថែទាំផ្លូវ ROAD CARE Mobile App» ដែលអាចទាញយកពី App Store ឬ Play Store ដោយកម្មវិធីនេះនឹងបញ្ជូនព័ត៌មានទៅក្រុមតេឡេក្រាម «សុវត្ថិភាពចរាចរណ៍យើង OUR ROAD SAFETY» ដោយភ្ជាប់ព័ត៌មានទីតាំង និងពេលវេលាដោយស្វ័យប្រវត្តិផងដែរ៕
ដើម្បីជ្រាប់កាន់តែច្បាស់ សូមអាននូវសេចក្តីណែនាំខាងក្រោម៖
