[ចំនេះដឹង] ក្នុងអំឡុងពេលដែលតម្លៃប្រេងឡើងថ្លៃជារៀងរាល់ថ្ងៃបែបនេះ ពួកយើងមកដឹងគន្លឹះមួយចំនួន សម្រាប់ការបើកបររថយន្តប្រអប់លេខអូតូ ដើម្បីសន្សំសំចៃប្រេងបានច្រើន។ ខាងក្រោមនេះជាគន្លឹះចំនួន ៥ ដែលអាចជួយដល់លោកអ្នកដែលប្រើប្រាស់រថយន្តប្រភេទប្រអប់លេខអូតូចេញពីការស៊ីប្រេងខ្លាំង៖
១) ការជាន់ហ្គាលបន្ថែមល្បឿនមួយៗ កុំប្រយាប់ ៖ ម៉ាស៊ីនស៊ីប្រេងច្រើនបំផុតពេលយើងកំពុងជាន់ហ្គាលបន្ថែមល្បឿន ដូច្នេះហើយ អ្នកគួរនៅពេលបញ្ឆេះម៉ាស៊ីនហើយ គួរតែជាន់ហ្គាលយឹតៗកុំប្រយាប់ ។ ប្រសិនបើអ្នកចង់បន្ថែមល្បឿន អ្នកគួរតែដកជើងចេញពីហ្គាល បន្ទាប់មកជាន់ហ្គាលបន្ថែមល្បឿនម្តងទៀត ការធ្វើបែបនេះ នឹងជួយកាត់បន្ថយកម្លាំងម៉ាស៊ីនធ្វើការខ្លាំងជាងមុន។
២) គួរបើកបរប្រើល្បឿនថេរ ៨០-៩០ គីឡូម៉ែត្រក្នុងមួយម៉ោង៖ ដោយសារតែល្បឿននេះគឺជារយៈពេលដែលម៉ាស៊ីននឹងស៊ីប្រេងតិចបំផុតបើធៀបនឹងចម្ងាយដែលបានធ្វើដំណើរ។ អ្នកគួរតែបើកបរក្នុងល្បឿនថេរ កាត់បន្ថយការជាន់ហ្វ្រាំងមិនចាំបាច់ វាអាចចំណាយពេលយូរបន្តិចដើម្បីទៅដល់គោលដៅរបស់អ្នក ប៉ុន្តែការធ្វើបែបពិតជានឹងសន្សំសំចៃប្រេងកាន់តែច្រើន ។
៣) បើក ឬលៃតម្រូវម៉ាស៊ីនត្រជាក់ឲ្យខ្ពស់ជាងមុនបន្តិច៖ ជាទូទៅប្រព័ន្ធម៉ាស៊ីនត្រជាក់របស់រថយន្តរួមចំណែកដល់ការបង្កើនការប្រើប្រេងរបស់ម៉ាស៊ីន។ ព្យាយាមលៃតម្រូវសីតុណ្ហភាពខ្ពស់ជាងធម្មតាបន្តិច យ៉ាងហោចណាស់ ខ្ពស់ជាង ២ ទៅ ៣ ដឺក្រេ ដែលវាជួយទៅដល់ខ្យល់របស់ម៉ាស៊ីនធ្វើការតិច ដែលជួយសន្សំសំចៃប្រេងកាន់តែច្រើន។
៤) ដាក់លេខ N នៅពេលឈប់ស្តុប៖ ការធ្វើបែបនេះវានឹងកាត់បន្ថយការប្រើប្រាស់យ៉ាងហោចណាស់ ៣០% បើធៀបនឹងការដាក់ឧបករណ៍ D និងការជាន់ហ្វ្រាំង។ ប៉ុន្តែវិធីល្អបំផុតគឺចាប់ហ្វ្រាំង ឬដាក់ហ្រ្វាំងដៃដើម្បីកុំឲ្យរថយន្តវិល។
៥) សម្ពាធខ្យល់កង់កុំធូរពេក ៖ ការប្រើប្រាស់ជាមួយសម្ពាធសំបកកង់ធូរ ឬទាបពេក វានឹងបង្កើនការកកិតរវាងផ្ទៃសំបកកង់ និងផ្ទៃផ្លូវ ដែលជាហេតុធ្វើឲ្យម៉ាស៊ីនស៊ីប្រេងកាន់តែច្រើន។ ដូច្នេះសំបកកង់គួរតែមានសម្ពាធខ្យល់ដែលត្រឹមត្រូវដូចដែលបានបញ្ជាក់ដោយក្រុមហ៊ុនផលិត។ បន្ថែមពីនេះ សម្ពាធខ្យល់កង់ត្រូវតែលើសពីធម្មតានៅពេលដឹកអ្នកដំណើរពេញ និងដឹកឥវ៉ាន់ (Full Load) ៕
