[ទីផ្សារបរទេស] ម៉ូតូ Honda Dio 110 ស៊េរីឆ្នាំ ២០២២ ប្រភេទ Scooter បានដាក់លក់ជាផ្លូវការនៅក្នុងប្រទេសជប៉ុន ដែលមានតម្លៃចាប់ពី ១ ៨១៧ ដុល្លារសហរដ្ឋអាមេរិក។
ម៉ូតូ Honda Dio 110 នេះបានប្រើប្រាស់ម៉ាស៊ីន SOHC ចំណុះ ១០៩សេសេ ទំហំ ១ស៊ីទ្បាំង ប្រព័ន្ធស្អំប្រេង air-cooled ផលិតកម្លាំង ៨,៧សេះ និងកម្លាំងរមួល ៩ញ៉ូតុនម៉ែត្រ ហើយភ្ជាប់ជាមួយនឹងប្រអប់លេខអូតូ CVT ។
ខណៈដែលម៉ូតូ Scooter នេះមានទម្ងាន់ស្រាលត្រឹមតែ ៩៦ គីទ្បូក្រាម និងធុងផ្ទុកសាំងបានចំណុះរហូតដល់ ៤,៩ លីត្រ។
ដោយទ្បែកចំពោះការឌីហ្សាញនៃម៉ូតូ Honda Dio 110 រចនាទ្បើងបែបស្រដៀងគ្នានឹង Honda Lead និង Beat ដោយវាបានបំពាក់មកជាមួយនឹងចង្កៀងមុខ-ក្រោយ LED Halogen , កុងទ័រឌីជីថល LCD សម្រាប់បង្ហាញព័ត៌មានល្បឿន ឬសាំង និងប្រព័ន្ធសោរ Smart-Key ជាដើម។ ហើយម៉ូតូ Scooter នេះក៏បានបំពាក់នូវហ្រ្វាំងឌីសមុខ និងក្រោយហ្វាំ្រងស្គរផងដែរ។
យ៉ាងណាមិញចំពោះម៉ូតូ Honda Dio 110 ស៊េរីឆ្នាំ ២០២២ មិនទាន់មានការបញ្ជាក់ច្បាស់លាស់នៅទ្បើយសម្រាប់កម្រិតនៃការប្រើប្រាស់សាំងក្នុង ១ លីត្រ អាចជិះបានចម្ងាយប៉ុន្មានគីទ្បូម៉ែត្រនោះទេ៕
