ស្ថាប័នឯករាជ្យ EPA បានប្រកាសថារថយន្ត Rivian R1T នឹងអាចបើកបរបានចម្ងាយ ៣១៤ម៉ាយ ដែលស្មើប្រមាណ ៥០៥គីឡូម៉ែត្រ សម្រាប់ប្រភេទ Launch Edition ដែលមានបំពាក់អាគុយចំណុះ ១៣៥kWh។
ដោយឡែកស្ថាប័ន EPA ក៏បានបង្ហាញចេញរយៈចម្ងាយបើកបរសម្រាប់រថយន្ត R1S ដែលរំពឹងថាចេញលក់នាឆ្នាំក្រោយផងដែរ ដោយមានបំពាក់អាគុយដូចគ្នាប៉ុន្តែវាអាចបើកបរបានចម្ងាយ ៣១៦ម៉ាយ ខុសគ្នាចំនួន ២ម៉ាយ ប៉ុណ្ណោះ។
គួរដឹងថារថយន្ត R1T ត្រូវបានក្រុមហ៊ុនបញ្ជាក់ថាវានឹងចេញលក់នៅខែកញ្ញានេះនៅលើទីផ្សារសហរដ្ឋអាមេរិក ក្រោយពីបានពន្យារពេលអស់ជាច្រើនលើក។ ប្រសិនបើចេញលក់ខែនេះមែន វានឹងក្លាយជារថយន្តភីកអាប់អគ្គិសនីដំបូងគេដែលមានលក់ជាសាធារណៈ។
ឆាប់ៗខាងមុខនេះវានឹងត្រូវរងការប្រកួតប្រជែងពីគូប្រកួតខ្លាំងៗដូចជារថយន្ត Ford F-150 Lightning, GMC Hummer EV និងរថយន្ត Tesla Cybertruck ផងដែរ ដែលបច្ចុប្បន្នរថយន្តទាំងអស់នេះនៅមិនទាន់មានរយៈចម្ងាយបើកបរផ្លូវការចេញដោយស្ថាប័ន EPA នៅឡើយទេ គឺមានតែរយៈចម្ងាយប៉ាន់ស្មានរបស់ក្រុមហ៊ុនប៉ុណ្ណោះ៕
