[បរទេស] ក្រុមហ៊ុន Toyota Motor Thailand Co., Ltd. បានធ្វើការបង្ហាញថារថយន្ត Toyota YARIS ATIV ស៊េរីឆ្នាំ ២០២៣ ថ្មី ទទួលបានការកក់ទុកមុនសរុបបានចំនួនជាង ២១ ៣៥០ គ្រឿងក្នុងរយៈពេលត្រឹមតែមួយខែប៉ុណ្ណោះ ចាប់តាំងពីការចេញលក់នៅថ្ងៃទី ៩ ខែសីហា ឆ្នាំ ២០២២។ ចំនួននេះគឺជាការលក់កើនឡើងក្នុងកំឡុងសប្តាហ៍ដំបូងចាប់ពីថ្ងៃដាក់លក់ជាង ៥ ០០០ គ្រឿង ខ្ពស់ជាងគោលដៅដែលក្រុមហ៊ុនដៅទុក ៣ ៥០០ គ្រឿងក្នុងមួយខែ។
Toyota Yaris Ativ ថ្មីត្រូវបានរំលេចដោយការរចនាយ៉ាងស្រស់ស្អាតផ្នែកខាងក្រៅ Fastback ដោយមានមកជាមួយភ្លើងចង្កៀងមុខប្រភេទ Full LED, ថាសកង់ស្ព័រទំហំ ១៦ អ៊ីញ, ចង្កៀងខាងក្រោយ Full LED Light-guiding ជាមួយនឹងអំពូលស៊ីញ៉ូដែល Toyota បង្ហាញថាអាចត្រូវបានពង្រឹងបន្ថែមទៀតជាមួយនឹងការតុបតែងផ្សេងៗដែលគ្របដណ្តប់លើចំណង់ចំណូលចិត្តរបស់អតិថិជន។
ផ្នែកខាងក្នុងក៏មានការផ្លាស់ប្ដូររចនាបថខ្លះៗផងដែរ ហើយវាមានបំពាក់មកជាមួយកុងទ័រព័ត៌មានឌីជីថលទំហំ ៧អ៊ីញ, មានអេក្រង់កម្សាន្តទំហំ ៩អ៊ីញ ភ្ជាប់មុខងារ Apple CarPlay និង Android Auto, ឧបករណ៍បំពងសំឡេងម៉ាក Pioneer, ភ្លើងលម្អ មានសរុប ៦៤ពណ៌ និងមានម៉ាស៊ីនត្រជាក់ចែកដាច់ជាពីរតំបន់។ បន្ថែមពីនេះ ក៏ជាលើកដំបូងផងដែរ ដែលប្រព័ន្ធសុវត្ថិភាពកម្រិតខ្ពស់ Toyota Safety Sense ត្រូវបានដំឡើងនៅក្នុងរថយន្តនេះ ។
ទាក់ទងនឹងផ្នែកម៉ាស៊ីន រថយន្តនេះដំណើរការដោយម៉ាស៊ីនចំណុះ ១,២ លីត្រ ទំហំ ៤ ស៊ីឡាំង អាចផលិតកម្លាំងបាន ៩៤ សេះ និងកម្លាំងរមួល ១១០ ញ៉ូតុនម៉ែត្រ ភ្ជាប់ជាមួយប្រអប់លេខប្រភេទ CVT-i និងប្រើប្រព័ន្ធបើកបរប៉ុងមុខ។ សម្រាប់រថយន្តនេះមានតម្លៃចាប់ពី ១៥ ២០០ដុល្លារ រហូតដល់ ១៩ ៦០០ដុល្លារ នៅក្នុងទីផ្សារប្រទេសថៃ៕
