[បរទេស] ក្រុមហ៊ុនផលិតរថយន្ត Lexus គ្រោងនឹងធ្វើការដាក់បង្ហាញចេញនៅរថយន្ត Lexus LM minivan ថ្មីទាំងស្រុងនៅក្នុងកម្មវិធីតាំងពិពណ៌រថយន្ត Shanghai International Auto Show ចាប់ពីថ្ងៃ ១៨ ដល់ ២៧ ខែមេសា ឆ្នាំ ២០២៣ ។
ជាមួយគ្នានេះ គេនៅមិនប្រាកដថាជាម៉ូដែលកែមុខមាត់ថ្មី ឬរថយន្ត Lexus LM ជំនាន់ថ្មីទាំងស្រុងនៅនោះទេ។ យ៉ាងណាមិញ ពីរូបថតស្រមោលដែលបង្ហាញទម្រង់ខាងក្រោយ វាបង្ហាញថាផ្នែកខាងក្រៅបានទទួលការកែប្រែយ៉ាងសំខាន់។ អ្វីដែលពិសេសបំផុតនោះគឺ ទីតាំង D-pillar និងចង្កៀងក្រោយត្រូវបានគេគិតថារចនាឡើងវិញទាំងស្រុង រួមជាមួយនឹងកាង spoiler ខាងក្រោយថ្មីផងដែរ។
Lexus LM ផ្អែកលើ Toyota Alphard / Vellfire ជំនាន់ទី៣ មានប្រវែងសរុប ៥ ០៤០ ម.ម ហើយមាននៅក្នុងការកំណត់រចនាសម្ព័ន្ធ ៧ កៅអី មានអេក្រង់កំសាន្តធំសម្រាប់អ្នកដំណើរខាងក្រោយ។ បើនិយាយពីកម្លាំងម៉ាស៊ីនវិញ LM 300h ត្រូវបានបំពាក់ដោយម៉ាស៊ីន Hybrid ចំណុះ ២,៥ លីត្រ ទំហំ ៤ ស៊ីឡាំង ខណៈដែល LM 350 បំពាក់ដោយម៉ាស៊ីនចំណុះ ៣,៥ លីត្រ V6 ។
ជាមួយនឹងការមកដល់នៃ LM ប្រភេទ minivan ថ្មីនៅក្នុងទ្វីបអឺរ៉ុប វាត្រូវបានគេរំពឹងថានឹងត្រូវបានបំពាក់ដោយថាមពលអគ្គិសនី ដើម្បីអនុលោមតាមបទប្បញ្ញត្តិនៃការបំភាយឧស្ម័នដ៏តឹងរ៉ឹងរបស់ទ្វីបនេះ។ យ៉ាងណាមិញ សម្រាប់ព័ត៌មានលម្អិតបន្ថែម យើងនឹងចាំមើលទាំងអស់គ្នា ៕
