ចាប់តាំងពីបានសម្រេចចិត្តផលិតរថយន្ត SUV កម្លាំងខ្លាំង និងប្រណីតភាពខ្ពស់ លក់លើទីផ្សារមក Lamborghini បានកើនឡើងតម្លៃយ៉ាងគំហុក។ ក្រុមហ៊ុនរថយន្តអ៊ីតាលីនេះ ត្រូវបានគេរាយការណ៍ថាមានតម្លៃខ្ទង់ ១១ ពាន់លានដុល្លារ ដែលជាឲ្យវាក្លាយជាបេក្ខភាព IPO (ការលក់ហ៊ុនជាសាធារណៈ) ដ៏សំខាន់មួយរបស់សម្ព័ន្ធ Volkswagen។
ផ្អែកតាម Bloomberg Intelligence បានឲ្យដឹងថា រថយន្តម៉ូដែលថ្មីដែលត្រៀមនឹងប្រកាសចេញដូចជារថយន្តមហាកម្លាំងប្រើម៉ាស៊ីន Hybrid ដែលគ្រោងចេញឆ្នាំក្រោយ នឹងជួយបង្កើនតម្លៃក្រុមហ៊ុនរឹតតែខ្ពស់បន្ថែមទៀត។ ពេលនេះ Lamborghini គឺមានតម្លៃប្រហាក់ប្រហែលនឹង Ferrari ដែរ។ នេះបើតាមការផ្សាយរបស់ Autonews Europe។
និយាយអំពីការលក់វិញ ការលក់របស់ Lamborghini កើនឡើង ៥១% កាលពីឆ្នាំ ២០១៨ ដែលលក់រថយន្តបានរហូតដល់ ៥ ៧៥០ គ្រឿង ដែលមានជាង ១ ៧០០ គ្រឿងជាម៉ូដែល Urus។ ខណៈពេលនេះ សហរដ្ឋអាមេរិកជាទីផ្សារធំជាងគេរបស់ក្រុមហ៊ុន៕
