ម៉ូតូអគ្គិសនីរបស់អឺរ៉ុប សាកភ្លើងពេញម្តង អាចជិះបានចម្ងាយ ៤០ គ.ម តម្លៃខ្ទង់ជិត ២ ពាន់ដុល្លារ

[ទីផ្សារបរទេស] ថ្មីៗនេះក្រុមហ៊ុន Super បានបញ្ចេញនូវម៉ូតូអគ្គិសនី Soco CU mini ប្រភេទ Scooter ជាមួយនឹងការសាកភ្លើងពេញម្តងអាចជិះបានចម្ងាយ ៤០ គីទ្បូម៉ែត្រ សម្រាប់ទីផ្សារនៅក្នុងតំបន់អឺរ៉ុប។

ម៉ូតូអគ្គិសនី Super Soco CU mini មានទំហំប្រវែង ១៦៥៥ មម, ទទឺង ៦៩៥, កម្ពស់ ១០៨៣ មម និងទម្ងាន់ ៥០ គីទ្បូក្រាមប៉ុណ្ណោះ។ បន្ថែមពីនេះទទួលបានការឌីហ្សាញគួរឱ្យទាក់ទាញត្រង់រូបរាងបែបសាមញ្ញាដោយវាបានបំពាក់នូវកុងទ័រឌីជីថល LCD អាចភ្ជាប់ជាមួយទូរស័ព្ទ និងប្រព័ន្ធ GPS navigation, Smart keys និង រន្ធសាក USB ដ៏ទំនើបផងដែរ។

សម្រាប់ម៉ូតូអគ្គិសនី Super Soco CU mini ប្រើប្រាស់ម៉ូទ័រ ៦០០ វ៉ាត់ ដែលអាចបង្កើតល្បឿនបរិមាណ ៤២ គីទ្បូម៉ែត្រក្នុងរយៈពេល ១ ម៉ោង។ ខណៈដែលម៉ូតូនេះបំពាក់នូវអាគុយប្រភេទថ្មលីចូម ៧ គីទ្បូក្រាម ជាមួយនឹងការសាកភ្លើងពេញម្តងអាចជិះបានចម្ងាយ ៤០ គីទ្បូម៉ែត្រ។

សូមបញ្ជាក់ថាបច្ចុប្បន្ននេះម៉ូតូអគ្គិសនី Super Soco CU mini ត្រូវបានដាក់លក់ក្នុងតម្លៃ ១ ៨៩៩ ដុល្លារសម្រាប់ទីផ្សារនៅតំបន់អឺរ៉ុប៕