បច្ចេកវិទ្យារថយន្តនៅក្នុងប្រទេសចិន ឈានឡើងបន្ថែមទៀតហើយ ដោយអាជ្ញាធរចិន បានចេញអាជ្ញាបណ្ណជាលើកដំបូង អនុញ្ញាតឲ្យរថយន្ត Deepal SL03 របស់ Changan និង Arcfox S. របស់ BAIC ប្រើប្រាស់ប្រព័ន្ធបើកបរស្វ័យប្រវត្តិកម្រិត៣ Level 3។
ទោះជាយ៉ាងណាក៏ដោយ ប្រព័ន្ធបើកបរស្វ័យប្រវត្តិនេះ មិនទាន់ត្រូវបានឲ្យប្រើទូលំទូលាយនៅទូទាំងប្រទេសនៅឡើយទេ ពោលគឺត្រូវបានកំណត់នៅលើផ្លូវជាក់លាក់ស្ថិតក្នុងក្រុងឆុងឈីង ជាមួយល្បឿនត្រឹម ៥០គ.ម/ម៉ និងនៅក្រុងប៉េកាំង ល្បឿនត្រឹម ៨០គ.ម/ម៉។
ការកំណត់ផ្លូវជាក់លាក់សម្រាប់ប្រព័ន្ធ Level 3 នេះ គឺដើម្បីអាចឲ្យអាជ្ញាធរត្រួតពិនិត្យ តាមដានពីប្រសិទ្ធភាពថាតើបច្ចេកវិទ្យានេះ ផ្តល់សុវត្ថិភាពកម្រិតណា នៅពេលប្រតិបត្តិការជាក់ស្តែង។
គួរដឹងថា កម្រិតនៃប្រព័ន្ធបើកបរស្វ័យប្រវត្តិ ដែលកំណត់ដោយអង្គការ SAE បច្ចុប្បន្នគឺមាន ៥កម្រិត។ ក្នុងនោះ សម្រាប់កម្រិតទី៣ គឺរថយន្តអាចបើកបរដោយខ្លួនវាបាននៅក្នុងស្ថានភាពជាក់ស្តែង ហើយអ្នកបើកបរអាចសម្រាកបាន។ ហើយសម្រាប់កម្រិតទី៥ គឺពេញលេញតែម្តង ដោយរថយន្តអាចបើកបរខ្លួនវានៅគ្រប់ទីតាំង និងស្ថានភាពទាំងអស់៕
