កំពូលរថយន្ត SUV របស់ជប៉ុន Toyota Land Cruiser 300 បានមានវត្តមាននៅលើទីផ្សារតាំងពីឆ្នាំ២០២១ ជាមួយការផលិតឡើងនៅលើគ្រោងឆ្អឹង TNGA-F Platform ដែលមានទាំងជម្រើសប្រើម៉ាស៊ីនសាំង, ម៉ាស៊ីនម៉ាស៊ូត និងជម្រើសប្រភេទកូនកាត់ HEV ដែលទើបចេញ។ ប៉ុន្តែនាពេលថ្មីៗនេះ យើងតាមសារព័ត៌មានជប៉ុន Creative Trend បានបញ្ចេញនូវព័ត៌មានអំពីជម្រើសម៉ាស៊ីនថ្មីដែលរថយន្ត SUV របស់ជប៉ុននេះនឹងទទួលបានបន្ថែមទៀត ដែលជាប្រភេទអាចសាកភ្លើងបាន PHEV។
ក្នុងនោះ បើសិនជាការចុះផ្សាយនេះ វានឹងកើតឡើងនាពេលខាងមុខ នោះម៉ាស៊ីន PHEV ដំបូងរបស់ Land Cruiser 300 នេះអាចនឹងជាជម្រើសម៉ាស៊ីន ៣,៥លីត្រ V6 ដែលដំណើរការរួមគ្នាជាមួយម៉ូទ័រអគ្គិសនី និងកញ្ចប់អាគុយទំហំធំ ដែលអាចផ្តល់នូវភាពសន្សំសំចៃសម្រាប់ការប្រើប្រាស់ប្រចាំថ្ងៃ។
ត្រលប់ទៅឆ្នាំ២០២៣ យើងក៏ធ្លាប់លឺពាក្យចចាមអារ៉ាមថា Toyota ពិចារណាផ្តល់នូវជម្រើសម៉ាស៊ីន PHEV និងអ៊ីដ្រូហ្សែនសម្រាប់ Land Cruiser 250 ឬ Land Cruiser Prado។ ហើយខណ:ពេលបច្ចុប្បន្ននេះ Toyota Land Cruiser Prado ឬ Land Cruiser 250 ក៏ទទួលបាននូវជម្រើសម៉ាស៊ីនសាំង, ម៉ាស៊ីនម៉ាស៊ូត និងម៉ាស៊ីនកូនកាត់ Mild Hybrid ផងដែរ។ ដូច្នេះជាហេតុផលដែលត្រូវបានគេជឿជាក់ថា គម្រោងផ្តល់នូវជម្រើសម៉ូឌែលប្រភេទអគ្គិសនីសម្រាប់ត្រកូល Land Cruiser ទាំងអស់ក៏បានរៀបចំឡើងដោយក្រុមហ៊ុន Toyota អស់រយៈពេលជាយូរមកហើយ៕
