[បរទេស] Afeela ដែលជាក្រុមហ៊ុនបណ្តាក់ទុនរួមគ្នារវាងក្រុមហ៊ុន Sony និងក្រុមហ៊ុន Honda បានធ្វើការដាក់បង្ហាញនៅរថយន្តអគ្គិសនីសុទ្ធ Afeela 1 ជាគូប្រជែងរបស់ Tesla Model S នៅឯពិព័រណ៍រថយន្ត CES 2025 ដែលកំពុងធ្វើឡើងនៅសហរដ្ឋអាមេរិក ។
Afeela 1 បំពាក់ម៉ូទ័រអគ្គិសនីចំនួន ២ អាចផលិតកម្លាំងបានសរុប ៤៨៣ សេះ និងអាគុយ ដែលអាចផ្តល់នៅចំងាយនៃការបើកបរ ៤៨៣ គីឡូម៉ែត្រ នៅពេលសាកថ្មពេញម្តង ព្រមទាំងអាចសាកថ្មពីស្ថានីយសាកថ្ម supercharging របស់ Tesla បានផងដែរ ។
សម្រាប់ការឌីស្សាញផ្នែកខាងក្រៅមានលក្ខណៈបែបស្ព័រ ដោយប៉ាណាមុខបិទជិត ចង្កៀងមុខ-ក្រោយ LED ព្រមទាំងថាសកង់ស្ព័រទំហំ ២១អ៉ីញជាដើម ។ លើសពីនេះ ក៏បានភ្ជាប់មកជាមួយប្រព័ន្ធជំនួយការអ្នកបើកបរ ADAS ជំនាន់ចុងក្រោយ ដែលមានសេនស័រចំនួនដល់ទៅ ៤០ទីតាំង ។
ចំពោះនៅផ្នែកខាងក្នុងឌីស្សាញបែប minimalistic មានកុងទ័របង្ហាញព័ត៌មានឌីជីថល និងអេក្រង់កំសាន្ត touchscreen សម្រាប់បញ្ជាមុខងារទូទៅនៅលើរថយន្ត ក៏ដូចជាដៃចង្កូតប្រភេទ yoke-style ។
គួរឲ្យដឹងថា Afeela 1គ្រោងនឹងចេញលក់ជាផ្លូវការនៅក្នុងឆ្នាំ ២០២៦ ផ្តល់ជូននៅជម្រើស ៣ពណ៌ ជាមួយតម្លៃលក់ចាប់ពី ៨៩ ៩០០ ដុល្លារឡើងទៅ ៕
