រថយន្តអគ្គិសនី K3 EV បានធ្វើការចេញលក់ជាផ្លូវការនៅលើទីផ្សារប្រទេសចិន ជាមួយជម្រើស ២ម៉ូឌែល ដោយមានតម្លៃចាប់ពី ២៧ ៦០០ដុល្លារ ដល់ ២៩ ២០០ដុល្លារ ។
សម្រាប់ការឌីស្សាញនៃរថយន្ត K3 EV មានភាពស្រដៀងគ្នានឹងប្រភេទដំណើការដោយម៉ាស៊ីនសាំង ផលិតសម្រាប់ទីផ្សារប្រទេសចិន។ ចំពោះភាពខុសគ្នាដែលគួរអោយគត់សម្គាល់រួមមាន ប៉ាណាបិទជិតខាងមុខ និងការឌីស្សាញឡើងវិញ Console កណ្តាល រួមជាមួយប៊ូតុងផ្លាស់លេខ និងកុងទ័រទំហំ ៧អ៊ីញថ្មី។
បន្ថែមពីនេះសម្រាប់ប្រភេទខ្ពស់បំផុត បានបំពាក់ជាមួយថាសកង់ទំហំ ១៧អ៊ីញ, ចង្កៀងខាងមុខប្រភេទ LED, Power Sunroof, Smart Key, កន្លែងសាកថ្មឥតខ្សែ, អេក្រង់កម្សន្ត touchscreen ទំហំ ១០,២៥អ៊ីញ និងប្រព័ន្ធសុវត្តិភាពដូចជា៖ ពោងសុវត្តិភាពចំនួន ៦, ប្រព័ន្ធត្រួតពិនិត្យសម្ពាធកង់, Adaptive Cruise Control, Front Collision Avoidance, Lane Departure Warning, Lane Keeping Assist, Drive Fatigue Reminder, Blind Spot Collision Warning និងAutomatic High Beam។
រថយន្ត K3 EV ដំណើរការដោយម៉ូទ័រអគ្គិសនីចំនួនមួយនៅខាងមុខ មានកម្លាំងសរុប ១៨១សេះ និងកម្លាំងរមួល ៣១០ញ៉ូតុនម៉ែត្រ។ សម្រាប់ម៉ូទ័រអគ្គិសនី បានទទួលថាមពលពីកញ្ចប់អាគុយទំហំ ៤៨,៦គីឡូវ៉ាត់ ដែលអនុញ្ញាតអោយរថយន្តបើកបរបានចំងាយ ៤១០គីឡូម៉ែត្រ នៅពេលសាកថ្មពេញម្តង៕
