ឡាន BMW នៅវៀតណាមបញ្ចុះតម្លៃដល់ ៤ពាន់ដុល្លារ ក្រោយប្រកាសពីការផលិតក្នុងស្រុក

[ទីផ្សារបរទេស] ក្រោយពីការប្រកាសដំណឹងផលិតរថយន្ត BMW នៅក្នុងប្រទេសរបស់ខ្លួន BMW សាខានៅវៀតណាម បានផ្ដល់ជូនការបញ្ចុះតម្លៃពិសេសដែលមានរហូតដល់ខ្ទង់ ៤ពាន់ដុល្លារ។

ការបញ្ចុះតម្លៃមានខុសគ្នាទៅតាមម៉ូដែលនៃរថយន្ត ដោយរថយន្ត BMW 7 Series ដែលជាប្រភេទប្រណីតជាងគេ មានផ្ដល់ជូនការបញ្ចុះតម្លៃដល់ ១០០លានដុង ស្មើនឹងប្រមាណ ៤ ២៤០ដុល្លារ និងមានផ្ដល់ជូនកាដូបន្ថែមជាច្រើនទៀត។

ចំណែករថយន្ត BMW 4-Series ប្រភេទ Gran Coupe មានផ្ដល់ជូនការបញ្ចុះតម្លៃប្រមាណ ៣ ៤០០ដុល្លារ ខណៈដែលរថយន្តម៉ូដែលដទៃដូចជា 3 Series, 5 Series ឬ BMW X3 , X4, X5 និង X6 ក៏មានផ្ដល់ជូនតម្លៃពិសេសសម្រាប់អតិថិជនផងដែរ។

គួរដឹងថារថយន្ត BMW ដែលនឹងត្រូវផលិតនៅក្នុងស្រុកមានដូចជាម៉ូដែល BMW 3 Series, BMW 5 Series , BMW X3 និង BMW X5 ដោយនឹងមានប្រើម៉ាស៊ីនដូចជារថយន្តនាំចូលដែរ។ រថយន្តដំឡើងក្នុងស្រុកនេះរំពឹងនឹងមានតម្លៃធូរថ្លៃជាងប្រមាណ ៣ពាន់ដុល្លារ ទៅ ៣ម៉ឺនដុល្លារ ធៀបនឹងរថយន្តនាំចូល៕