MG អាចលក់រថយន្ត SUV ប្រើប្រាស់ថាមពលអគ្គិសនីសុទ្ធម៉ូដែល ZS EV បានចំនួន ១ ០០០ គ្រឿងក្នុងរយៈពេល ២ សប្ដាហ៍នៅចក្រភពអង់គ្លេស ដោយវាមានតម្លៃធូរថ្លៃចាប់ពី ២៦ ២៥០ ដុល្លារ ជាតម្លៃសម្រាប់ការចេញលក់ដំបូង។
ជាមួយតម្លៃដែលបានកំណត់ខាងលើនេះ ធ្វើឲ្យ MG ZS EV ជារថយន្តអគ្គិសនីមួយម៉ូដែលដែលមានតម្លៃធូរថ្លៃបំផុត សម្រាប់ក្នុងទីផ្សារអឺរ៉ុប។ រថយន្តអគ្គិសនីនេះប្រើប្រាស់ម៉ូទ័រអគ្គិសនីបំពាក់នៅផ្នែកខាងមុខ ដែលមានកម្លាំង ១០៥ គីឡូវ៉ាត់ (១៤១ សេះ) ដែលទទួលបានពីអាគុយប្រភេទលីចូមទំហំ ៤៤,៥ គីឡូវ៉ាត់ម៉ោង ហើយអាចបើកបរបានចម្ងាយ ២៦២ គីឡូម៉ែត្រពេលសាកចេញ។
ZS EV គឺជារថយន្តទំនើបជាងគេបំផុតរបស់ MG មានដូចជា Advanced Emergency Braking, Blind Spot Monitoring, Lane Keep Assist និង Adaptive Cruise Control។ បន្ថែមពីនេះក៏មានដំបូលថ្លាអាចបើកបាន, អេក្រង់ Touch ទំហំ ៨ អ៊ីញជាមួយមុខងារនាំផ្លូវ, ប្រព័ន្ធ Bluetooth ហើយផ្នែកខាងក្នុងរថយន្តមានទំហំធំទូលាយ។ រថយន្ត MG ZS EV នឹងចាប់ផ្ដើមបញ្ចេញលក់នៅខែកញ្ញា ឆ្នាំ ២០១៩ នេះ៕
