ប្រសិនបើរថយន្តរបស់អ្នក ជិតផុតកំណត់កាលបរិច្ឆេទនៃការត្រួតពិនិត្យលក្ខណៈបច្ចេកទេសយានយន្ត (ឆៀក) ហើយ គឺត្រូវតែយកទៅឆៀក ឲ្យបានឆាប់ ចៀសវាងផុតកំណត់ដែលត្រូវរងការផាកពិន័យផ្សេងៗ។ យ៉ាងណាមិញ មុនពេលយករថយន្តទៅឆៀក គឺកុំភ្លេចយកឯកសារទៅជាមួយ និងត្រូវត្រួតពិនិត្យរថយន្តខ្លួនផងដែរ ដើម្បីប្រាកដថាពេលចូលឆៀក គឺនឹងជាប់តែម្តង។
ចំពោះឯកសារដែលត្រូវភ្ជាប់ទៅជាមួយ រួមមាន៖
១. សម្រាប់យានយន្តចុះបញ្ជីរួច (មានផ្លាកលេខ) គឺត្រូវមានប័ណ្ណសម្គាល់យានយន្ត ឬ កាតគ្រី និងវិញ្ញាបនបត្រឆៀកចាស់ ឬលតាបត្របិទជាប់កញ្ចក់យានយន្ត។
២៖ សម្រាប់ «យានយន្តមិនទាន់ចុះបញ្ជី (ក្រដាសពន្ធ) គឺត្រូវមានអត្តសញ្ញាណប័ណ្ណ និងបង្កាន់ដៃបង់ពន្ធយានយន្ត។
ចំពោះរថយន្តវិញ ត្រូវពិនិត្យចំនុចមួយចំនួនដូចជា
-ពិនិត្យមើលហ្វ្រាំងដៃ ដើម្បីប្រាកដថាមានដំណើរការត្រឹមត្រូវ
-ពិនិត្យមើលកញ្ចក់ ជៀសវាងមានស្នាម និងប្រេះ
-ពិនិត្យមើលចង្កៀង ជៀសវាងមានការប្រេះស្រាំ
-ពិនិត្យមើលអំពូលភ្លើងស៊ីញ៉ូ ភ្លើងហ្វ្រាំងឲ្យមានដំណើរការត្រឹមត្រូវ
-ពិនិត្យមើលសំបកកង់ជៀសវាងការសឹករិចរិល
-ពិនិត្យមើលខ្សែក្រវាត់ ឲ្យមានដំណើរការត្រឹមត្រូវ។
សូមជម្រាបថា ចំពោះតម្លៃសេវាសាធារណៈនៃការត្រួតពិនិត្យលក្ខណៈបច្ចេកទេសយានជំនិះ រួមមានដូចខាងក្រោម៖
-រថយន្តគ្រួសារ ប្រភេទថ្មីខ្លាញ់គោ តម្លៃ ៣៦ ០០០រៀល
-រថយន្តគ្រួសារ ផ្ទុកត្រឹម ៤នាក់ តម្លៃ ៤២ ០០០រៀល
-និងរថយន្តគ្រួសារ ផ្ទុកពី ៥នាក់ ដល់ ៩នាក់ តម្លៃ ៤៨ ០០០រៀល៕
