តាមរយៈការបញ្ចេញនូវការអាប់ដេតលើ Software ឥតឈប់ឈរ បានធ្វើឲ្យរយៈចម្ងាយបើកបរលើរថយន្តអគ្គិសនីរបស់ Tesla កាន់តែល្អប្រសើរឡើង។ ពេលនេះដែររថយន្ត Tesla Model S បានឈានដល់កំណត់ត្រាថ្មីមួយ ដោយក្លាយជារថយន្តអគ្គិសនីដំបូងដែលអាចជិះបានចម្ងាយលើសពី ៤០០ ម៉ាយ (ប្រមាណ ៦៤៣ គ.ម)។
រយៈចម្ងាយបើកបររបស់ Tesla Model S នេះ ត្រូវបានលោក Elon Musk លើកឡើងកាលពីដើមឆ្នាំ ហើយវាទើបតែមានការបញ្ជាក់ជាផ្លូវការពីស្ថាប័ន EPA។ ស្ថាប័ន EPA បានបញ្ជាក់ថារថយន្ត Model S Long Range Plus មានរយៈចម្ងាយដល់ទៅ ៤០២ ម៉ាយ ដែលចម្ងាយនេះគឺកើនឡើងជិត ២០% បើធៀបនឹង Model S 100 ឆ្នាំ ២០១៩ ដែលមានបំពាក់អាគុយដូចគ្នា។
ត្បិតថាមានរយៈចម្ងាយបើកបរប្រសើរជាងមុនមែន ប៉ុន្តែថ្មីៗនេះ Tesla Model S Long Range Plus ទទួលបានការបញ្ចុះតម្លៃ ៥ពាន់ដុល្លារ ដែលធ្វើឲ្យតម្លៃធ្លាក់មកដល់ ៧៤ ៩៩០ ដុល្លារ សម្រាប់ទីផ្សារសហរដ្ឋអាមេរិក៕
