Hyundai បានបង្ហាញចេញព័ត៌មានកាន់តែច្រើនអំពីរថយន្ត Tuscon ប្រភេទ PHEV (Plug-in Hybrid) ដែលរថយន្តនេះនឹងដាក់លក់នៅតំបន់អឺរ៉ុបជាផ្លូវការចាប់ពីត្រីមាសទីពីរនៃឆ្នាំ ២០២១។
រថយន្ត Tucson PHEV មានគួបផ្សំដោយម៉ាស៊ីន Turbocharged កម្លាំង ១៧៧សេះ ដែលមានចំណុះ ១,៦លីត្រ ជាមួយនឹងម៉ូទ័រអគ្គិសនីចំនួនមួយដែលមានកម្លាំង ៩០សេះ ហើយវាពឹងផ្អែកលើអាគុយដែលផ្ទុកថាមពលបាន ១៣,៨គីឡូវ៉ាត់ម៉ោង។ សរុបបញ្ចូលគ្នាវាអាចឲ្យរថយន្តផលិតកម្លាំងបាន ២៦១សេះ។
Hyundai បានធ្វើការប៉ាន់ស្មានថារថយន្ត Tucson PHEV របស់ខ្លួន នឹងអាចបើកបរដោយប្រើប្រាស់ថាមពលអគ្គិសនីសុទ្ធបានចម្ងាយលើសពី ៥០គីឡូម៉ែត្រ។ រថយន្តនេះមានមកជាមួយនូវដុំសាក ៧,២គីឡូវ៉ាត់ ប៉ុន្តែ Hyundai មិនទាន់ប្រាប់រយៈពេលសាកអាគុយនោះទេ ដែលព័ត៌មាននេះ និងព័ត៌មានដទៃទៀតនឹងត្រូវប្រកាសឲ្យដឹងនាពេលក្រោយ៕
