ក្រុមហ៊ុន Kia នឹងចេញលក់រថយន្ត Carnival ស៊េរីឆ្នាំ២០២១ របស់ខ្លួនជាផ្លូវការ នៅក្នុងប្រទេសអូស្ត្រាលី នាពេលឆាប់ៗខាងមុខនេះ។
រថយន្តប្រភេទ Minivan ឆ្នាំ២០២១ ខាងលើនេះ មានប្រវែងវែងជាងមុន ៤០មីល្លីម៉ែត្រ ហើយមានប្រវែងពីកង់មុខទៅកង់ក្រោយ វែងជាងមុន ៣០មីល្លីម៉ែត្រ ដែលធ្វើឲ្យកាប៊ីនខាងក្នុងរបស់វាកាន់តែធំទូលាយជាងមុន។
រថយន្ត Kia Carnival នេះ មានជម្រើសកៅអីច្រើន ដូចជា កៅអី ៣ជួរ ឬ ៤ជួរ ដែលផ្តល់កន្លែងអង្គុយសម្រាប់អ្នកដំណើរ ៧នាក់, ៨នាក់ ឬ ១១នាក់។ វាក៏មានបំពាក់លក្ខណៈពិសេសមកស្តង់ដារជាច្រើន រួមទាំង អេក្រង់កម្សាន្ត Touchscreen ទំហំ ១២,៣អ៊ីញ, កុងទ័រឌីជីថល និងមុខងារ Live Traffic Info ជាដើម។
ចំពោះទីផ្សារប្រទេសអូស្ត្រាលី រថយន្តនេះផ្តល់ជម្រើសម៉ាស៊ីនចំនួន ២ គឺ ម៉ាស៊ីនសាំងចំណុះ ៣,៥លីត្រ GDI V6 មានកម្លាំង ២៩០សេះ និង ម៉ាស៊ីនម៉ាស៊ូតចំណុះ ២,២លីត្រ CRDI មានកម្លាំង ១៩៨សេះ។ វាដំណើរការដោយប្រអប់លេខអូតូ ៨វគ្គ និងប៉ុងមួយវិលកង់មុខ FWD។
Carnival ឆ្នាំ២០២១ នឹងផ្តល់ជម្រើសដូចជា S, Si, SLi និង Platinum ជាមួយតម្លៃចាប់ពី ៣៨ ៧៦០ដុល្លារ ដល់ ៥៣ ៨០០ដុល្លារ៕
