[ទីផ្សារបរទេស] កាលពីថ្ងៃទី ១១ ខែកក្កដា ឆ្នាំ ២០២២ រថយន្ត Maruti Suzuki Grand Vitara បានបង្ហាញខ្លួនជាផ្លូវការ ជារថយន្តប្រភេទ SUV ខ្នាតកណ្តាល ហើយបច្ចុប្បន្នមានការកក់ទុកមុនជាង ២០ ០០០ គ្រឿង ក្នុងរយៈពេលតមិនដល់មួយខែ នៅក្នុងប្រទេសឥណ្ឌា។
Suzuki Grand Vitara បានប្រើប្រាស់គ្រោងឆ្អឹង Global C-platform និងមានប្រវែងសរុប ៤ ៣៤៥ ម.ម ទទឹង ១ ៧៩៥ ម.ម កំពស់ ១ ៦៤៥ ម.ម និងប្រវែងគន្លាតកង់មុខ-ក្រោយ ២ ៦០០ ម.ម ។ ដោយភ្ជាប់មកជាមួយចង្កៀងមុខ LED ប្រភេទ split-headlight អបជាមួយអំពូលបំភ្លឺពេលថ្ងៃ អំពូលកាត់អ័ព្ទ LED, ប៉ាណាខាងមុខតុបតែងដោយក្រូម៉េ, ថាសកង់ស្ព័រទំហំ ១៧ អ៊ីញ និងចង្កៀងក្រោយប្រភេទ LED អូសកាត់ពីផ្នែកម្ខាងទៅផ្នែកម្ខាង។
ចំណែកនៅផ្នែកខាងក្នុងរបស់ Grand Vitara បានរតុបតែងដោយពូកស្បែកពីរពណ៌ សម្រាប់កៅអី ផ្ទៃតាប៊្លូ និងកុងសូលកណ្តាលត្រូវបានស្រោបដោយអាលុយមីញ៉ូម។ កុងទ័រព័ត៌មានឌីជីថលទំហំ ៧ អ៊ីញ និងអេក្រង់កំសាន្ត touchscreen ទំហំ ៩ អ៊ីញ ភ្ជាប់មុខងារ Android Auto និង Apple CarPlay ជាមួយនឹង Suzuki Connect ចុងក្រោយបង្អស់។
រថយន្តនេះដំណើរការដោយម៉ាស៊ីនសាំងចំណុះ ១,៥លីត្រ ជាមួយជម្រើសម៉ាស៊ីនប្រភេទ Mild-Hybrid ផលិតកម្លាំងបាន ១០១សេះ កម្លាំងរមួល ១៣៧ញ៉ូតុនម៉ែត្រ និងប្រភេទ Intelligent Electric Hybrid ដំណើរការរួមគ្នាដោយ ម៉ូទ័រអគ្គិសនីកម្លាំង ៤៩គីឡូវ៉ាត់ម៉ោង និងអាគុយលីចូម ដែលអាចផលិតកម្លាំងបាន ១១៤សេះ ភ្ជាប់ជាមួយប្រអប់លេខដៃ ៥ វគ្គ និងអូតូ ៦ វគ្គ៕
៕
