រថយន្តប្រភេទ REEV ដែលមកពីពាក្យថា Range Extended Electric Vehicle គឺជារថយន្តដែលប្រើម៉ាស៊ីនសាំងផង និងអគ្គិសនីផង។ ប៉ុន្តែខុសពី PHEV ពោលគឺ ម៉ាស៊ីនសាំងរបស់រថយន្ត REEV មិនមែនជាអ្នកបង្វិលកង់ឡើយ ដោយវាដើរតួជាម៉ាស៊ីនភ្លើងតែមួយគត់។ អ៊ីចឹង តើម៉ាស៊ីនសាំងរបស់រថយន្ត REEV នេះ ត្រូវការប្រើប្រាស់ចាំបាច់បំផុតនៅពេលណាខ្លះ?
១. នៅពេលអាគុយជិតអស់ថាមពល សល់ត្រឹមប្រហែល ២០% ឬតិចជាងនេះ នោះម៉ាស៊ីនសាំងនឹងដំណើរការធ្វើជាម៉ាស៊ីនភ្លើងសាកបញ្ចូលថាមពលអាគុយ ដើម្បីអាចបន្តដំណើរទៅបានឆ្ងាយទៀត ដោយមិនចាំបាច់ឈប់រថយន្តនិងសាកតាមស្ថានីយបញ្ចូលនោះឡើយ។ សម្រាបើ់រថយន្ត REEV បច្ចុប្បន្ននេះ បើសាកភ្លើង និងចាក់សាំងពេញ គឺអាចបើកបរបានចម្ងាយសរុបជាង ១ពាន់គីឡូម៉ែត្រឯណោះ។
២. នៅពេលអាគុយសល់ថាមពលទាបបំផុត ប៉ុន្តែអ្នកបើកបរ ចង់បើកល្បឿនខ្ពស់ៗដល់ចាប់ពីជាង ១៥០គីឡូម៉ែត្រឡើងទៅ នោះម៉ាស៊ីនសាំងក៏ផ្តល់ថាមពលបន្ថែមទៀតឲ្យម៉ូទ៏រផងដែរ ដើម្បីអាចឲ្យរថយន្តបន្តដំណើរក្នុងល្បឿននេះទៀត។
៣. នៅពេលរថយន្តត្រូវការកម្លាំងខ្លាំង ដូចជាការបើកឡើងភ្នំ ឬអូសសណ្តោង នោះម៉ាស៊ីនសាំងក៏នឹងប្រតិបត្តិការដោយស្វ័យប្រវត្តិផងដែរ ដើម្បីផ្តល់ថាមពលបន្ថែមដល់ម៉ូទ័រទោះបីជាអាគុយសល់ថាមពលច្រើនក៏ដោយ។ គួរបញ្ជាក់ដែរថា បើរថយន្ត REEV នេះ ត្រូវបានម៉ាស៊ីនសាំងធ្វើការកាន់តែខ្លាំង នោះកម្រិតស៊ីសាំង ក៏កាន់តែច្រើនផងដែរ៕
