[ទីផ្សារបរទេស] រថយន្ត BMW XM ត្រូវបានគេដឹងថាកំពុងតែចូលរោងចក្រផលិត ហើយរថយន្តនេះក៏ត្រៀមនឹងបង្ហាញវត្តមានឆាប់ៗនេះដែរ ដោយការប្រកាសចេញអាចនឹងធ្វើឡើងខែកញ្ញានេះតែម្ដង។
តាមការចុះផ្សាយរបស់ BMWBlog បានឲ្យដឹងថារថយន្ត BMW XM នឹងប្រកាសចេញជាផ្លូវការនៅថ្ងៃទី២៧ ខែកញ្ញា ឆ្នាំ២០២២ ដែលមានន័យថាសល់ពេលតែប៉ុន្មានសប្ដាហ៍ទៀតប៉ុណ្ណោះ។ ព័ត៌មានលម្អិតអំពីការប្រកាសចេញនៅមិនទាន់លេចចេញនៅឡើយទេ ប៉ុន្តែរំពឹងថាលេចចេញក្នុងពេលប៉ុន្មានសប្ដាហ៍ខាងមុខ។
BMW XM គឺជារថយន្តប្រភេទ PHEV ដែលប្រើប្រាស់ម៉ាស៊ីន Twin-Turbocharged ចំណុះ៤,៤លីត្រ ថ្មី ដែលមាន៨ស៊ីឡឡាំង គួបផ្សំជាមួយម៉ូទ័រអគ្គិសនីមួយ។ សម្រាប់ XM Concept មានការបំពាក់ម៉ាស៊ីនប្រភេទនេះដែលមានកម្លាំង ៧៥០សេះ ប៉ុន្តែសម្រាប់ផលិតផលសម្រេចនឹងអាចផលិតកម្លាំងបានត្រឹម ៦៤៤សេះប៉ុណ្ណោះ។
ជាមួយប្រព័ន្ធម៉ាស៊ីន PHEV នេះដែរ ទំនងជាអាចឲ្យ BMW XM បើកបរដោយប្រើថាមពលអគ្គិសនីសុទ្ធបានចម្ងាយដល់ ៨០គីឡូម៉ែត្រ ដោយព័ត៌មាននេះនឹងត្រូវបញ្ជាក់ជាផ្លូវការពេលដែលរថយន្ត SUV មហាកម្លាំងនេះបានប្រកាសចេញ៕
