ក្រុមហ៊ុន Bugatti បានបង្ហាញចេញជាផ្លូវការនូវរថយន្តម៉ូដែលថ្មី Centodieci ក្នុងកម្មវិធី Pebble Beach ដែលរូបរាងរបស់វាដូចគ្នានឹងរូបភាពបែកធ្លាយផ្ទាល់តែម្ដង។
រថយន្តម៉ូដែលថ្មីនេះមានបំពាក់ម៉ាស៊ីនដូចម៉ូដែល Chiron ដែរ ពោលម៉ាស៊ីនចំណុះ ៨,០ លីត្រ ១៦ ស៊ីឡាំង ប៉ុន្តែវាអាចផលិតកម្លាំងបាន ១៥៧៨ សេះ ខ្លាំងលើស Chiron ចំនួន ៩៩ សេះ។ ជាមួយលក្ខណៈសម្បត្តិនេះ ម៉ូដែល Centodieci អាចបង្កើនសន្ទុះពី ០ – ១០០ គ.ម/ម៉ ក្នុងពេលត្រឹម ២,៤ វិនាទី និងបានកំណត់ល្បឿនអតិបរមាត្រឹម ៣៨០ គ.ម/ម៉។
គួរដឹងថា Centodieci មានទម្ងន់ស្រាលជាង Chiron ប្រមាណ ២០ គីឡូក្រាម ដែលគេអាចធ្វើឲ្យវាកាន់តែស្រាលបានតាមរយៈការប្រើប្រាស់ផ្លិតទឹកទម្ងន់ស្រាលជាងមុន និងប្រព័ន្ធទប់លំនឹងផលិតអំពីសរសៃកាបូនជាដើម។
រថយន្តម៉ូដែលថ្មីនេះមានផលិតត្រឹម ១០ គ្រឿងប៉ុណ្ណោះ ហើយក្នុងមួយឆ្នាំដឹកជញ្ជូនឲ្យអតិថិជន ២ គ្រឿងគប់។ ត្បិតថាវាមានតម្លៃរហូតដល់ ៨,៩ លានដុល្លារ ប៉ុន្តែទាំង ១០ គ្រឿង គឺសុទ្ធតែមានម្ចាស់អស់ហើយ៕
