ក្រុមហ៊ុន BYD បានធ្វើការដាក់បង្ហាញចេញនូវកំណែអាប់ដេតថ្មីរបស់រថយន្ត BYD Atto 3 ជាផ្លូវការ ជាមួយនឹងការរចនាថ្មី និងបច្ចេកវិទ្យាជំនួយការបើកបរដែលកាន់តែប្រសើរជាងជំនាន់មុន។ ក្នុងនោះ រថយន្ត SUV អគ្គិសនីនេះនឹងចាប់ផ្តើមដាក់លក់នៅក្នុងប្រទេសចិនក្នុងពេលឆាប់ៗខាងមុខនេះក្រោមឈ្មោះ Yuan Plus ។
សម្រាប់កំណែអាប់ដេតថ្មីនេះ BYD Atto 3 ទទួលបានការកែប្រែរូបរាងខាងក្រៅមួយចំនួនមានដូចជាផ្នែកខាងមុខ ដែលបានបំពាក់កាងស្ព័ររចនាថ្មី ជាមួយនឹងកាមេរ៉ា និងកាងរន្ធខ្យល់ធំជាងមុន ខណៈផ្នែកចង្កៀងនៅរក្សារការរចនា “Dragon’s Whiskers” ដដែល ចំណែកផ្នែកខាងក្រោយវិញបានអាប់ឌែតទៅលើដំបូល និងភ្លើង។ លើសពីនេះ នៅផ្នែកបច្ចេកវិទ្យា Atto 3 ក៏ទទួលបាននូវបាននូវប្រព័ន្ធជំនួយអ្នកបើកបរថ្មី ” BYD God Eye C” ផងដែរ។
សម្រាប់ BYD Atto 3 ថ្មីនេះ មានប្រវែង ៤ ៤៥៥ ម.ម ទទឹង ១ ៨៧៥ ម.ម កម្ពស់ ១ ៦១៥ ម.ម និងប្រវែងគម្លាតកង់ ២ ៧២០ ម.ម ដំណើរការដោយម៉ូទ័រអគ្គិសនី ១ ផលិតកម្លាំងបាន ២០១ សេះ ផ្គួបជាមួយអាគុយទំហំ ៤៩,៩ និង ៦០,៥ គីឡូវ៉ាត់ម៉ោង អាចបើកបរបានចម្ងាយ ៤៣០ និង ៥១០ គីឡូម៉ែត្រ នៅពេលសាកថ្មពេញម្តង។
គួរបញ្ជាក់ថា តម្លៃរបស់ Atto 3 បច្ចុប្បន្នមានចន្លោះពី ១៥ ២២៥ ដុល្លារ ដល់ ២០ ១២០ ដុល្លារ នៅក្នុងទីផ្សារប្រទេសចិន ប៉ុន្តែតម្លៃថ្មីរបស់កំណែអាប់ឌែតថ្មីនេះមិនត្រូវបានបង្ហាញចេញនូវឡើយទេ៕
