ក្រុមហ៊ុន BYD បានបញ្ចេញរថយន្តអគ្គិសនីម៉ូដែលថ្មីរបស់ខ្លួនឈ្មោះថា BYD e7 ដែលជារថយន្តអគ្គិសនីទំហំមធ្យម និងបង្កើតឡើងដើម្បីបង្ហាញពីភាពជាអ្នកដឹកនាំរបស់ BYD ក្នុងវិស័យរថយន្តអគ្គិសនីនៅប្រទេសចិន រួមជាមួយនឹងយុទ្ធសាស្ត្រផ្នែកទីផ្សាររបស់ក្រុមហ៊ុន។
រថយន្ត e7 មានប្រវែង ៤ ៧៨០ ម.ម ទទឹង ១ ៩០០ ម.ម កម្ពស់ ១ ៥១៥ ម.ម និងប្រវែងគម្លាតកង់ ២ ៨២០ ម.ម ដំណើរការដោយម៉ូទ័រអគ្គិសនីចំនួន ១ ផលិតកម្លាំងបាន ១៣៤ សេះ អាចបើកបរបានដល់ល្បឿនអតិបរមា ១៥០គ.ម/ម៉ោង ផ្គួបជាមួយជម្រើសថ្មទំហំ ៤៨ និង ៥៧,៦ គីឡូវ៉ាត់ម៉ោង អាចបើកបរបានចម្ងាយ ៤៥០ និង ៥២០ គីឡូម៉ែត្រ នៅពេលសាកថ្មពេញម្តង តាមស្តង់ដារ CLTC ។
ចំពោះការរចនារបស់រថយន្តសេរ៊ីថ្មីនេះ គឺមានភាពស្រដៀងទៅនឹងរថយន្តអគ្គិសនីផ្សេងៗរបស់ខ្លួនដែរ ដូចជាម៉ូឌែល Qin L EV និង Sealion 05 EV SUV ។ ខណៈកាលបរិច្ឆេទចេញលក់ តម្លៃ និងព៌ត័មានលម្អិតផ្សេងៗទៀតខាងក្រុមហ៊ុនមិនទាន់ចេញនៅឡើយទេ តែត្រូវបានរំពឹងថានឹងមានការដាក់លក់ជាផ្លូវការក្នុងប៉ុន្មានខែខាងមុខនេះ ជាមួយតម្លៃលក់ប្រហាក់ប្រហែលគ្នានឹងម៉ូឌែល e2 Honor Edition ដែលបានចេញលក់នៅខែមិនា ឆ្នាំ ២០២៤ ក្នុងតម្លៃចាប់ពី ១៣ ០០០ ដុល្លារ នៅក្នុងទីផ្សារចិន៕
