ក្រុមហ៊ុនចិន BYD ត្រូវបានគេរាយការណ៍ថាកំពុងសិក្សាពីគម្រោងបង្កើតរថយន្តអគ្គិសនីបខ្នាតតូច (Kei car) ហើយដាក់លក់នៅទីផ្សារប្រភេទ ដើម្បីប្រជែងជាមួយរថយន្តអគ្គិសនីពេញនិយមបំផុតរបស់ជប៉ុនគឺរថយន្ដ Nissan Sakura។ រថយន្ដប្រភេទ Kei car គឺជាប្រភេទនៃយានយន្តជប៉ុនតូចៗទម្ងន់ស្រាល ត្រូវបានរចនាឡើងដាក់លក់ជាមួយតម្លៃសមរម្យ មានកម្រិតសុីប្រេងឥន្ធនៈតិច ផ្ដោតសំខាន់ក្នុងការបើកបរក្នុងទីក្រុង។ ពាក្យ kei គឺជាទម្រង់ខ្លីនៃពាក្យ (keijidosha) ដែលបកប្រែថារថយន្តធុនស្រាល។
ចំពោះរថយន្ដម៉ូដែលថ្មីរបស់ BYD អាចនឹងមានវត្ដមាននៅប្រទេសជប៉ុនក្នុងឆ្នាំ ២០២៦។ បើនិយាយទីផ្សាររថយន្តអគ្គិសនីរបស់ជប៉ុនបានធ្លាក់ចុះ ៣៣% ក្នុងឆ្នាំ ២០២៤ ។ ប៉ុន្តែចំពោះក្រុមហ៊ុនចិន BYD បែរជាងមានកំណើនការលក់នៅក្នុងប្រទេសជប៉ុន ជាហេតុធ្វើឲ្យពូួកគេ ចង់ផលិតរថយន្ដខ្នាតតូច ដើម្បីវាយលុកទីផ្សារក្នុងប្រទេសជប៉ុន ។
យ៉ាងណាមិញគិតមកទល់េពលនេះក្រុមហ៊ុន Nissan នៅតែគ្របដណ្តប់ទីផ្សាររថយន្តអគ្គិសនីនៅជប៉ុន ហើយ Tesla នាំមុខក្នុងចំណោមរថយន្តអគ្គិសនីនាំចូលពីខាងក្រៅ ប៉ុន្តែក្រុមហ៊ុន BYD ឥឡូវនេះត្រូវបានគេរាយការណ៍ថាកំពុងបង្កើតរថយន្ដអគ្គិសនីខ្នាតតូចថ្មីរបស់ខ្លួនន ហើយសង្ឃឹមថានឹងជួយឲ្យពួកគេឡើងដល់កំពូលតារាងនៃការលក់រថយន្តអគ្គិសនីនៅជប៉ុន។
សារព័ត៌មាន Nikkei រាយការណ៍ថា ក្រុមហ៊ុន BYD កំពុងបង្កើតរថយន្តអគ្គិសនីប្រភេទ Kei car ដើម្បីប្រជែងជាមួយរថយន្តអគ្គិសនីលក់ដាច់បំផុតរបស់ជប៉ុន គឺរថយន្ដ Nissan Sakura។ Nissan Sakura គឺជារថយន្តប្រភេទ Kei car ដែលមានតម្លៃប្រហែល ១៨ ២៥០ ដុល្លារ។ Sakura មានថាមពលថ្មតូចត្រឹមតែ ២០គីឡូវ៉ាត់ម៉ោង ដែលអាចរត់បានចម្ងាយផ្លូវ ១៨០ គីឡូម៉ែត្រ គិតតាមស្ដង់ដារវាស់ចម្ងាយ WLTC ។
ដើម្បីឲ្យក្រុមហ៊ុន BYD ទទួលជោគជ័យខ្លាំងជាមួយនឹងរថយន្ត Kei car របស់ខ្លួននៅប្រទេសជប៉ុន វាចាំបាច់ត្រូវតែយកឈ្នះលើលក្ខណៈបច្ចេកទេសរបស់ Sakura និងផ្តល់ជូនរថយន្តក្នុងតម្លៃទាបជាង។ ប្រសិនបើ BYD អាចលក់ក្នុងតម្លៃទាបជាងរថយន្តលក់ដាច់បំផុតនៅជប៉ុន នោះវាច្បាស់ណាស់ថាផែនការរបស់ពួកគេនឹងជោគជ័យ។
ដើម្បីបំពេញតាមបទប្បញ្ញត្តិនៃការផលិតរថយន្ដប្រភេទ kei car នៅជប៉ុន វាមិនត្រូវមានប្រវែងតួខ្លួនវែងជាង ៣.៤ ម៉ែត្រ ហើយទទឹងមិនត្រូវវែងជាង ១.៤៨ ម៉ែត្រ ចំណែកកម្ពស់ក៏មិនត្រូវខ្ពស់ជាង ២ម៉ែត្រឡើយ។ រថយន្ត Kei car ក៏ត្រូវបានកំណត់ត្រឹម ៦៤កម្លាំងសេះផងដែរ។ ការកំណត់បែបនេះ គឺដើម្បីឲ្យរថយន្ដចំណាយលុយបង់ពន្ធទាប ជាមួយរូបរាងតូចបែបនេះវាចំណេញក្នុងការចតសាកសមក្នុុងការប្រើប្រាស់ក្នុងក្រុង៕
