ក្រុមហ៊ុន Changan Auto បានដាក់បង្ហាញនូវបច្ចេកវិទ្យា Hybrid ថ្មីរបស់ខ្លួនមានឈ្មោះថា “Blue Core Super Engine” (蓝鲸超擎混动) ដោយដាក់គោលដៅឆក់យកបេះដូងអតិថិជនប្រើប្រាស់រថយន្តម៉ាស៊ីនចំហេះក្នុង (ICE) ប្រមាណ ៧០ លាននាក់ក្នុងមួយឆ្នាំៗនៅទូទាំងពិភពលោក។ ក្រុមហ៊ុនផលិតរថយន្តរបស់រដ្ឋមួយនេះ បានវិនិយោគទឹកប្រាក់ចំនួន ២ ពាន់លានយ័ន ឬស្មើនងប្រហែល ២៩១.១២ លានដុល្លារអាមេរិក ទៅលើមន្ទីរពិសោធន៍ជំនាញ ដើម្បីអភិវឌ្ឍរចនាសម្ព័ន្ធនេះឡើង ក្នុងគោលបំណងសម្រេចឲ្យបាននូវការប្រើប្រាស់ប្រេងឥន្ធនៈ សម្រាប់ការបើកបរក្នុងក្រុងត្រឹមតែ ២.៩៨ លីត្រ/១០០ គីឡូម៉ែត្រប៉ុណ្ណោះ នេះបើយោងតាមរបាយការណ៍ពី IT-home។
ជាមួយគ្នានេះក្រុមហ៊ុន Changan បានអះអាងថា Platform នេះគឺជាលទ្ធផលនៃការអភិវឌ្ឍអស់រយៈពេល ៦ ឆ្នាំ មានការចូលរួមពីវិស្វករចំនួន ១ ០០០ នាក់ និងសម្រេចបាននូវរបកគំហើញបច្ចេកទេសចំនួន ១៦៣ ចំណុច ទាំងផ្នែក Hardware និងផ្នែក Software នៃប្រព័ន្ធបញ្ជូនកម្លាំង។ បន្ថែមពីនេះ Changan កំពុងកំណត់ទីតាំងបច្ចេកវិទ្យានេះ ជាបច្ចេកវិទ្យាអន្តរកាលសម្រាប់អ្នកប្រើប្រាស់ ដែលចង់បានប្រសិទ្ធភាពសន្សំសំចៃខ្ពស់ដូចរថយន្តអគ្គិសនី ប៉ុន្តែមិនចង់ពឹងផ្អែកលើហេដ្ឋារចនាសម្ព័ន្ធស្ថានីយសាកថ្ម។
សម្រាប់ Platform Blue Core នេះ គឺជាការវិវឌ្ឍបន្តពីខ្សែស្រឡាយផលិតផលតាំងពីឆ្នាំ ២០១២ របស់ក្រុមហ៊ុន Changan និងប្រព័ន្ធបាញ់ប្រេងសម្ពាធខ្ពស់កម្រិត 500bar ដែលបានដាក់ឲ្យប្រើប្រាស់ក្នុងឆ្នាំ ២០២៤។ កំណែទម្រង់ថ្មីនេះប្រើប្រាស់វិធីសាស្ត្ររួមបញ្ចូលគ្នារវាងរួមបញ្ចូលជាមួយ «ប្រេងនិងអគ្គិសនី» ផ្តល់អាទិភាពដល់ការរុញច្រានដោយម៉ូទ័រអគ្គិសនីខ្លាំងជាងម៉ាស៊ីនសាំង។ ដើម្បីបញ្ជាក់ពីភាពធន់ក្នុងការប្រើប្រាស់រយៈពេលវែង ប្រព័ន្ធនេះត្រូវបានឆ្លងកាត់ការសាកល្បងបើកបរនៅលើផ្លូវពិតប្រាកដចម្ងាយ ២ លានគីឡូម៉ែត្រ លើប្រភេទផ្លូវខុសៗគ្នាដល់ទៅ ៧០ ប្រភេទនៅទូទាំងសកលលោក។
ក្រោយការធ្វើតេស្ដ Changan បានកំណត់យកតួលេខនៃការស៊ីប្រេងក្នុងក្រុង ២.៩៨ លីត្រ/១០០ គីឡូម៉ែត្រ ជាគោលដៅសមត្ថភាពចម្បងរបស់ខ្លួន។ តាមរយៈការបង្កើនប្រសិទ្ធភាពសម្រាប់ការបើកបរក្នុងល្បឿនទាប បច្ចេកវិទ្យានេះបានជួយដោះស្រាយបញ្ហានៃការបាត់បង់ប្រេងឥន្ធនៈខ្ពស់ ដែលតែងតែជួបប្រទះជាញឹកញាប់នៅក្នុងស្ថានភាពចរាចរណ៍ជិះឈប់ៗផ្ដោតលើការប្រើប្រាស់ក្នុងក្រុង។ ប្រព័ន្ធបញ្ជូនកម្លាំងត្រូវបានកែតម្រូវឲ្យមានកម្លាំងរមួលខ្ពស់ភ្លាមៗ និងកាត់បន្ថយកម្រិតសំឡេងរំខានឲ្យនៅទាបបំផុត ដែលធ្វើឲ្យលក្ខណៈនៃការបើកបរមានភាពស្រដៀងគ្នាទៅនឹងរថយន្តអគ្គិសនីសុទ្ធ។
ការដាក់សម្ពោធបច្ចេកវិទ្យានេះ គឺជាឆ្អឹងខ្នងដ៏សំខាន់សម្រាប់គោលដៅរបស់ក្រុមហ៊ុន Changan ក្នុងការសម្រេចឲ្យបាននូវការលក់នៅក្រៅប្រទេសចំនួន ៧៥០ ០០០ គ្រឿង ក្នុងឆ្នាំ ២០២៦។ ទន្ទឹមគ្នានេះ Platform នេះត្រូវបានអភិវឌ្ឍឡើងដោយមានការចូលរួមចំណែកយ៉ាងខ្លាំងពីមជ្ឈមណ្ឌលស្រាវជ្រាវ និងអភិវឌ្ឍន៍ (R&D) របស់ Changan មានមូលដ្ឋាននៅទីក្រុង Birmingham ចក្រភពអង់គ្លេស ដើម្បីធានាថាវាឆ្លើយតបទៅនឹងស្តង់ដារអន្តរជាតិ។
អ្វីដែលសំខាន់បំផុតបច្ចេកវិទ្យា Blue Core នឹងឈានជើងចូលក្នុងទីលានវិស័យយានយន្ដដើម្បីប្រកួតប្រជែង ជាមួយបច្ចេកវិទ្យា DM-i 5.0 របស់ BYD និង NordThor EM-i របស់ Geely មានកម្រិតស៊ីប្រេងទាបរហូតដល់ ២.៦២ លីត្រ/១០០ គីឡូម៉ែត្រ។ គោលដៅស៊ីក្នុងការកំណត់កម្រិតសុីប្រេងក្នុងការបើកបរក្នុងក្រុង ២.៩៨ លីត្រ ក្នុង ១០០ គីឡូម៉ែត្ររបស់ Changan គឺជាយុទ្ធសាស្ត្រការពារដើម្បីរក្សានូវប្រជាប្រិយភាពនៃរថយន្តត្រកូល UNI និង CS របស់ខ្លួននៅក្នុងប្រទេសចិន។
ការផ្លាស់ប្តូរយុទ្ធសាស្ត្របច្ចេកទេសនេះ គឺស្របទៅនឹងការបញ្ចូលដើមទុនរបស់ក្រុមហ៊ុន Changan ទៅក្នុងម៉ាកយីហោ Deepal របស់ខ្លួន ដែលទទួលបានថវិកាវិនិយោគ Series C ចំនួន ៦.១២ ពាន់លានយ័ន ឬស្មើប្រមាណ ៨៩០.៨៣ លានដុល្លារអាមេរិក កាលពីចុងឆ្នាំ ២០២៥ ដើម្បីពង្រីកផលិតកម្មរថយន្តអគ្គិសនីជំនាន់ទី ២ របស់ខ្លួន។
លើសពីនេះទៅទៀត ថ្មីៗនេះក្រុមហ៊ុន Changan និង CATL បានដាក់សម្ពោធរថយន្តប្រើប្រាស់អាគុយសូដ្យូម-អីយ៉ុង (Sodium-ion) ដំបូងគេបង្អស់លើលោក ដែលផលិតក្នុងទ្រង់ទ្រាយធំ គឺម៉ូឌែល Nevo A06 បំពាក់នូវអាគុយ CATL Naxtra ទំហំ ៤៥ គីឡូវ៉ាត់ម៉ោង ។ យុទ្ធសាស្ត្រប្រើប្រាស់អាគុយសូដ្យូម-អីយ៉ុងនេះ គឺដើម្បីដោះស្រាយកង្វល់រឿងចម្ងាយផ្លូវ និងសុវត្ថិភាពនៅក្នុងលក្ខខណ្ឌអាកាសធាតុត្រជាក់ខ្លាំង ដែលវាមានតួនាទីជា “ស្ពានចម្លង” ដូចគ្នានឹងអ្វីដែលផ្លែតហ្វម Blue Core កំពុងធ្វើសម្រាប់អ្នកប្រើប្រាស់រថយន្តម៉ាស៊ីនសាំងប្រពៃណីផងដែរ៕
