អតិថិជនរបស់ Ford Maverick ប្រហែលកំពុងទទួលបានការរីករាយ បន្ទាប់ពីទទួលបានការបង្ហាញអំពីកម្រិតស៊ីប្រេងជាផ្លូវការនៃរថយន្ត Ford Maverick ប្រភេទហាយប្រ៊ីដពីទីភ្នាក់ងារ EPA ជាមួយកម្រិតស៊ីប្រេង ៥,៦លីត្រនៅពេលបើកបរក្នុងក្រុង ប៉ុន្តែជាមួយដំណឹងដ៏រីករាយនេះ អតិថិជនក៏ត្រូវធ្វើការរង់ចាំនូវរថយន្តមកដល់ក្នុងដៃរបស់ខ្លួនរហូតដល់ដើមឆ្នាំ២០២២។
ចំពោះរថយន្ត Ford Maverick ប្រភេទហាយប្រ៊ីដ បានទទួលការវាយតម្លៃពីទីភ្នាក់ងារ EPA ជាមួយកម្រិតស៊ីប្រេងជាមធ្យមចំនួន ៥,៦លីត្រពេលបើកបរក្នុងក្រុង ឬ ៧,១លីត្រសម្រាប់ការបើកបរផ្លូវក្រៅក្រុង និងជាមធ្យម ៦,៣លីត្រ។
ក្រុមហ៊ុន Ford បានធ្វើការបញ្ចេញរថយន្តភីកអាប់ប្រភេទ Compact Unibody របស់ខ្លួនកាលពីខែមិថុនាកន្លងទៅ ជាមួយការចេញលក់ជម្រើសម៉ាស៊ីន ២,០លីត្រ Ecoboost ចាប់ផ្តើមនៅខែកញ្ញា។ ចំណែកប្រភេទហាយប្រ៊ីដ ដែលជាប្រភេទ Base Model ដែលរំពឹងថានឹងត្រូវបានលក់ក្នុងពេលតែមួយនេះ ឥឡូវនេះត្រូវបានពន្យាលពេលរហូតដល់ខែមករា ឆ្នាំ២០២២ទើបអាចដឹកអោយអតិថិជនរបស់ខ្លួន។
រថយន្តភីកអាប់នេះដំណើរការដោយម៉ាស៊ីនសាំងហាយប្រ៊ីដចំណុះ ២,៥លីត្រ ផ្គួបជាមួយម៉ូទ័រអគ្គិសនីចំនួនមួយ ផលិតកម្លាំងបាន ១៩១សេះ ភ្ជាប់ជាមួយប្រអប់លេខ CVT៕
