[ទីផ្សារបរទេស] ក្រុមហ៊ុនផលិតរថយន្ត GAC បានធ្វើការដាក់បង្ហាញចេញជាផ្លូវការនៅរថយន្ត GAC GS3 ជំនាន់ថ្មី ប្រភេទ Compact SUV ជាមួយការផ្លាស់ប្តូរដែលទាក់ទាញខ្លាំង នៅឯពិរព័ណ៌រថយន្ត Guangzhou Auto Show នឹងគ្រោងចេញលក់នៅទីផ្សារប្រទេសចិនក្នុងឆមាសទី ១ ឆ្នាំ ២០២៣ ជាមួយតម្លៃលក់ដែលរំពឹងទុកចាប់ពី ១២ ២៩៤ ដុល្លារ ។
GAC GS3 ជំនាន់ថ្មីមើលទៅទំនើបជាងបើប្រៀបធៀបទៅនឹងជំនាន់មុន ដោយប្រើប្រាស់ស្ថាបត្យកម្ម GPMA architecture ថ្មីដែលមានប្រវែងតួខ្លួនសរុប ៤ ៤១០ ម.ម ទទឹង ១ ៨៥០ ម.ម កម្ពស់ ១ ៦០០ ម.ម និងប្រវែងគម្លាតកង់មុខ-ក្រោយប្រវែង ២ ៦៥០ ម.ម ។
ម៉ូដែលជំនាន់ថ្មីត្រូវបានរចនាឡើងជាមួយរូបរាងកាន់តែស្ព័រជាងមុន ដោយតុបតែងជាមួយឆ្នូតពណ៌ទឹកក្រូច ដោយបំពាក់ប៉ាណាមុខមួយកផ្ទាំងធំ អបដោយចង្កៀងមុខប្រភេទ LED ថាសកង់ស្ព័រទំហំ ១៩ អ៊ីញ បន្ថែមកាងខាងមុខរចនាបែប aerodynamic, កាងជ្រែកខ្យល់ spoiler ខាងក្រោយទំហំធំ និងបំពង់ស៊ីមាំងចំនួន ២ ដែលបំពាក់នៅកណ្តាល។
រីឯនៅផ្នែកខាងក្នុង អាចផ្ទុកមនុស្សបាន ៥ នាក់ តាឡូឌីស្សាញបែប standard digital cockpit ដោយតុបតែងជាមួយពណ៌រួមមាន ពណ៌ប្រផេះស្រាលជាមួយនឹងឆ្នូតពណ៌ទឹកក្រូច និងពណ៌ខ្មៅជាមួយនឹងឆ្នូតពណ៌ខៀវស្រាល។ ប្រអប់លេខប្រភេទ “Crystal Shifter” ដំបូលកញ្ចក់បែប Panoramic sunroof មកជាស្តង់ដារ និងភ្លើងលម្អ ៣២ ពណ៌ ជាមួយនឹងកន្លែងដាក់ឥវ៉ាន់ ៣៤១ លីត្រនៅផ្នែកខាងក្រោយ ។ បន្ថែមពីនេះ GAC GS3 ជំនាន់ថ្មីនេះ ក៏បានមានមកជាមួយប្រព័ន្ធសុវត្ថិភាពរួមមានកញ្ចប់ ADiGO package ជាមួយនឹងប្រព័ន្ធជំនួយការបើកបរ ADAS ផងដែរ។
ចូលទៅកាន់ផ្នែកម៉ាស៊ីនវិញ រថយន្តនេះដំណើរដោយម៉ាស៊ីនចំណុះ ១,៥ លីត្រ Turbocharged អាចផលិតកម្លាំងបាន ១៧៤ សេះ និងកម្លាំងរមួល ២៧០ ញ៉ូតុនម៉ែត្រ ភ្ជាប់ដោយប្រអប់លេខអូតូ ៧ វគ្គ ប្រភេទ Dual-clutch អាចរត់ស្ទុះពី ០-១០០ គីឡូម៉ែត្រ/ម៉ោង ក្នុងរយៈពេល ៧,៥ វិនាទី និងកម្លាំងអតិបរម៉ា ១៩០ គីឡូម៉ែត្រ/ម៉ោង ជាមួយកម្រិតស៊ីសាំង ៦,១៨ លីត្រ/១០០ គីឡូម៉ែត្រ ។ ខណៈម៉ូដែល plug-in hybrid នឹងមាននៅពេលខាងមុខ៕
