រថយន្ត Isuzu D-Max ជំនាន់ថ្មីបានបង្ហាញមុខជាផ្លូវការក្នុងប្រទេសថៃ ដែលវាមានពាំនាំនូវរូបរាងថ្មី និងបច្ចេកវិទ្យាថ្មី ព្រមទាំងពង្រឹងសមត្ថភាពបើកបរ Off-Road កាន់តែប្រសើរជាងមុន។
D-Max ថ្មីនេះមានបន្ថែមនូវដុំកាឡេនៅផ្នែកខាងក្រោយជាលើកដំបូង ដែលជួយពង្រឹងសមត្ថភាពបើកបរលើផ្លូវលំបាក ហើយវាក៏អាចលុយទឹកបានជម្រៅជ្រៅជាងមុន ដែលឡើងពី ៦០០ ម.ម មកដល់ ៨០០ ម.ម ស្មើនឹងរថយន្ត Ford Ranger និង Mazda BT-50 ដែរ។
ពិសេសមួយទៀតនោះគឺបានប្រើប្រាស់ម៉ាស៊ីនថ្មី ជាម៉ាស៊ីនម៉ាស៊ូត Turbo ចំណុះ ៣,០ លីត្រ មាន ៤ ស៊ីឡាំង ដែលអាចបញ្ចេញកម្លាំងបាន ១៨៧ សេះ។ កម្លាំងនេះអាចឲ្យវាឈរនៅក្នុងចំណោមរថយន្តភីកអាប់ដទៃទៀតដូចជា Ford Ranger, Toyota Hilux, Mitsubishi Triton, Mazda BT-50 និង Nissan Navara ជាដើម។
ចំពោះរចនាបថខាងក្នុងក៏មានផ្លាស់ប្ដូរថ្មី និងផ្លាស់ប្ដូរច្រើនបំផុតបើប្រៀបនឹងម៉ូដែលមុន។ នៅចំកណ្ដាលមានអេក្រង់ទំហំ ៩ អ៊ីញ មានស្ទីលដូចជា Tablet អាចប្រើ Apple Car Play និង Android Car Play ហើយកុងទ័ររថយន្តជាប្រភេទឌីជីថលទំហំ ៤,២ អ៊ីញ។
រថយន្តនេះនឹងចេញលក់នៅថៃ នាថ្ងៃទី ១៩ ខែតុលានេះ ដោយមានតម្លៃចាប់ពី ៥៤៧ ០០០ បាតឡើងទៅ ដែលស្មើនឹងប្រមាណ ១៨ ០០០ ដុល្លារ៕
