ដើម្បីជំរុញដល់ការលក់រថយន្តអគ្គិសនីប្រណីតរបស់ខ្លួនម៉ូដែល I-Pace ក្រុមហ៊ុនរថយន្ត Jaguar នៅអាមេរិកបានបង្កើតនូវយុទ្ធសាស្ត្រពិសេស សង្ឃឹមថាទាក់ទាញចំណាប់អារម្មណ៍អ្នកជិះរថយន្តអគ្គិសនីរបស់ Tesla។
Jaguar ហ៊ានបញ្ចុះតម្លៃ ៣ ០០០ ដុល្លារលើរថយន្ត I-Pace របស់ខ្លួន ដល់ម្ចាស់រថយន្ត Tesla Model S, Model X និង Model 3 ហើយអ្នកដែលរស់នៅក្នុងផ្ទះមានមេគ្រួសារប្រើរថយន្ត Tesla ប្រភេទទាំងនេះ ក៏ទទួលបានការបញ្ចុះតម្លៃនេះដែរ។
បន្ថែមពីនេះនៅមានការបញ្ចុះតម្លៃលក់ ៥ ០០០ ដុល្លារ និងក្រេដីតចំនួន ៧ ០០០ ដុល្លារ ដែលសរុបទៅអាចទទួលបានការបញ្ចុះតម្លៃ ១៥ ០០០ ដុល្លារសម្រាប់ការទិញ I-Pace។ ជាមួយកញ្ចប់បញ្ចុះតម្លៃនេះ រថយន្ត I-Pace នឹងសល់តម្លៃចាប់ពីត្រឹម ៥៤ ៥០០ ដុល្លារប៉ុណ្ណោះ។
បញ្ជាក់ថា ដើម្បីបានការបញ្ចុះតម្លៃនេះ ម្ចាស់រថយន្ត Tesla មិនបាច់យករថយន្តរបស់ខ្លួនមកប្ដូរនោះទេ ពោលគ្រាន់តែបង្ហាញលិខិតបញ្ជាក់ភាពជាម្ចាស់រថយន្ត Tesla តែប៉ុណ្ណោះ។ រថយន្ត I-Pace មានបំពាក់ម៉ូទ័រអគ្គិសនីចំនួនពីរ អាចផលិតកម្លាំងបាន ៤០០ សេះ ជាមួយអាគុយថាមពល ៩០ គីឡូវ៉ាត់ម៉ោង៕
