ក្រុមហ៊ុន Kia បានធ្វើការបង្ហាញចេញនូវគម្រូរថយន្ត EV9 Concept ដែលជារថយន្ត SUV អគ្គិសនីកៅអី ៣ជួរថ្មី ក្នុងកម្មវិធីតាំងពិពណ៌រថយន្ត LA Auto Show។
ជាមួយ Concept នៃការឌីស្សាញនេះ EV9 ត្រូវបានរំពឹងថានឹងប្រើប្រាស់ជាមួយគ្រោងឆ្អឹង E-GMP(Electronic Global Modular Platform) របស់ក្រុមហ៊ុនផលិតរថយន្តកូរ៉េនេះផ្ទាល់។
សម្រាប់គម្រូនៃរថយន្តនេះមានប្រវែងសរុប ៤ ៩៣០មម ទទឹង ២ ០៥៥មម កម្ពស់ ១ ៧៩០មម និងប្រវែងគម្លាតកង់ ៣ ១០០មម។ ដោយវាមានកម្ពស់ទាបជាងរថយន្ត Telluride ចំនួន ៧០មម ប៉ុន្តែមានប្រវែងវែងជាង ៦៥មម និងមានប្រវែងគម្លាតកង់វែងជាង ២០០មមផងដែរ។
ជាមួយព័ត៌មានលម្អិតនៃការឌីស្សាញ បច្ចេកវិទ្យា និងថាមពលអាគុយ ក្រុមហ៊ុន Kia ពុំទាន់បានបង្ហាញចេញនូវព័ត៌មានលម្អិតនូវឡើយនោះទេ ប៉ុន្តែគេរំពឹងថារថយន្តនេះអាចបើកបរបានចម្ងាយ ៤៨២គីឡូម៉ែត្រ។ ហើយវាប្រើប្រាស់ជាមួយបច្ចេកវិទ្យាសាកថ្មល្បឿនលឿន ដោយ Kia ហៅថា “ Next-Generation ultra-fast Charging technology” ដែលអាចសាកថ្មពីថាមពល ១០ភាគរយ ដល់ ៨០ភាគរយប្រើពេលតិចជាង ៣០នាទី។
សូមបញ្ជាក់ផងដែរថារថយន្ត SUV អគ្គិសនីនេះ នឹងបង្ហាញវត្តមានជាផ្លូវការនៅលើទីផ្សារ ក្នុងកំឡុងពេលដូចគ្នានឹងរថយន្ត Hyundai Ioniq 7 នៅឆ្នាំ ២០២៤ ផងដែរ៕
