ថ្មីៗនេះ Lexus បានបញ្ចេញម៉ូដែលពិសេសចំនួន ២ គឺ RC F និង GS F ដែលមានពណ៌ប្រផេះគ្រើម Matt Mercury Grey ហើយវាជាលើកទី ១ ដែលក្រុមហ៊ុន Lexus បានផ្តល់ជម្រើសពណ៌គ្រើម។
Lexus ក៏បានសម្រេចចិត្តបង្ហាញអំពីរបៀបថែទាំរថយន្តដែលមានពណ៌គ្រើមបែបនេះ ធ្វើឲ្យមនុស្សជាច្រើនលែងចង់បានតែម្តង។ ជាការពិតណាស់ រថយន្តពណ៌គ្រើម ទាមទារឲ្យមានការថែទាំច្រើន ខុសពីរថយន្តដែលមានពណ៌រលោងធម្មតា។
Lexus បានពន្យល់ថា ពណ៌គ្រើមកើតឡើងពីការបាញ់ថ្នាំចំនួន ៤ ដំណាក់កាល។ ដោយសារតែពណ៌គ្រើមមានភាពខុសប្លែកពីពណ៌រលោង ដូច្នេះវាងាយនឹងជាប់ធូលីដី ហើយត្រូវការលាងសម្អាតដោយប្រុងប្រយ័ត្ន និងញឹកញាប់ទៀតផង។
Lexus បានណែនាំទៀតថា សារធាតុដែលប្រើក្នុងការលាងសម្អាតរថយន្ត ត្រូវលាងចេញភ្លាមៗ ដើម្បីកុំឲ្យពួកវាជាប់នៅលើផ្ទៃពណ៌ ដែលបង្កឲ្យកាន់តែពិបាកលាងសម្អាតចេញ។ មិនតែប៉ុណ្ណោះ អ្នកក៏មិនអាចប្រើគ្រឿងលាងសម្អាតធម្មតាបានដែរ។ ចំណែកឯថ្នាំកូត និងថ្នាំប៉ូលា ដែលត្រូវបានផលិតឡើងសម្រាប់ការពារថ្នាំរថយន្ត ក៏មិនអាចប្រើជាមួយពណ៌គ្រើមបានដែរ ព្រោះវានឹងធ្វើឲ្យពណ៌គ្រើមរលោងជាងមុន។
Lexus បានលម្អិតបន្ថែមនូវចំណុចសំខាន់មួយចំនួនទៀត ដូចជា ត្រូវចតរថយន្តដោយមានគម្របគ្រប , លាងសម្អាតវាដោយដៃ និងប្រញាប់សម្ងួតវាវិញ ដើម្បីកុំឲ្យជាប់ទឹក ជាដើម៕
