ក្រុមហ៊ុន Lexus បានប្រកាសចេញរថយន្តស្ព័រ RC ប្រភេទពិសេសថ្មីមួយហៅថា “Emotional Ash” សម្រាប់ទីផ្សារប្រទេសជប៉ុន ដោយក្នុងនោះបានធ្វើការអាប់ដេតមួយចំនួនលើរូបរាងរបស់វា សម្រាប់ម៉ូដែល RC350, RC300h និង RC300 F Sport។
ផ្នែកខាងក្រៅ រថយន្តប្រភេទពិសេសនេះមានបំពាក់ប៉ាណាមុខពណ៌ខ្មៅ Brilliant Black និង ស៊ុមប៉ាណាមុខខ្មៅ Jet Black។ ជាមួយគ្នានេះដែរ វាក៏បំពាក់យ៉ាន់ Alloy ទំហំ១៩អ៊ីញពណ៌ខ្មៅរលោង ក៏ដូចជា គម្របកញ្ចក់ពណ៌ខ្មៅរលោង Glossy Black ផងដែរ។
អ្វីដែលរឹតតែពិសេសនោះគឺ រថយន្ត Lexus RC ប្រភេទ Emotional Ash នឹងបំពាក់ចង្កៀងមុខ ប្រភេទ Trinocular Full-LED មកស្តង់ដារតែម្តង។
ក្រឡេកទៅមើលកាប៊ីនខាងក្នុងវិញ Emotional Ash ផ្តល់នូវកៅអីស្បែក Leather Sports Seats សម្រាប់ម៉ូដែល F Sport រំលេចដោយថ្នេរដេរពណ៌ទឹកប្រាក់ ព្រមទាំងដៃចង្កូតស្បែកទៀតផង។ ក្រៅពីនេះ វាបានបំពាក់ឈើនៅលើតាប្លូ, ដៃទ្វារ និងដៃចង្កូតផងដែរ។
គួរឲ្យដឹងថា រថយន្ត Lexus RC ប្រភេទ Emotional Ash ថ្មីនេះនឹងត្រូវដាក់លក់ក្នុងតម្លៃចាប់ពី ៦ ៤៦៩ ០០០យ៉េន (៦១ ៩៥០ដុល្លារ) សម្រាប់ម៉ូដែល Lexus RC300 ប្រើម៉ាស៊ីន ៤ស៊ីឡាំង, ៦ ៩១៧ ០០០យ៉េន (៦៦ ២៥០ដុល្លារ) សម្រាប់ម៉ូដែល RC300h ប្រើម៉ាស៊ីន Hybrid និងចុងក្រោយបង្អស់ ៧ ៤៧៧ ០០០យ៉េន (៧១ ៦១៥ដុល្លារ) សម្រាប់ម៉ូដែល RC350 ប្រើម៉ាស៊ីន ៤ស៊ីឡាំង៕
