ក្រុមហ៊ុន Mitsubishi បានធ្វើការបង្ហាញចេញនូវរថយន្តអគ្គិសនីថ្មី Airtrek ឆ្នាំ២០២២ ក្នុងកម្មវិធីតាំងពិពណ៌រថយន្ត Guangzhou Auto Show ឆ្នាំ២០២១ ជាផ្លូវការ ដែលផលិតឡើងសម្រាប់ទីផ្សារប្រទេសចិន។
រថយន្ត Airtrek ត្រូវបានបង្ហាញខ្លួនជាគម្រូរថយន្តដំបូងនាខែមេសា ឆ្នាំ២០២១កន្លងទៅ ជាមួយឈ្មោះ Airtrek ដែលធ្លាប់បានប្រើប្រាស់ទៅលើរថយន្ត Outlander ជំនាន់ដំបូង កាលពីចន្លោះឆ្នាំ ២០០១-២០០៨។
យោងតាមការចុះផ្សាយពីគេហទំព័រ Best Car Web បានបង្ហាញថារថយន្តនេះមានប្រវែងសរុប ៤ ៦០០មម ទទឹង ១ ៩១០មម កម្ពស់ ១ ៦៩០មម និងប្រវែងគម្លាតកង់ ២ ៨៣០មម។ ដោយវាកម្ពស់ទាបជាងរថយន្ត Outlander ចំនួន ៨០មម និងវែងជាងចំនួន ៥០មម។
រថយន្តអគ្គិសនី Mitsubishi Airtrek ឆ្នាំ២០២២ នឹងដំណើរការដោយអាគុយទំហំ ៧០គីឡូវ៉ាត់ម៉ោង ដែលអាចបើកបរបានចម្ងាយ ៥២០គីឡូម៉ែត្រ នៅពេលសាកពេញម្តង។
ផលិតឡើងសម្រាប់ទីផ្សារប្រទេសចិន រថយន្តអគ្គិសនីនេះនឹងត្រូវផលិតឡើងក្រោមការសហការរវាងក្រុមហ៊ុន GAC Mitsubishi Motors ក្នុងប្រទេសចិន ជាមួយផែនការនៃការចេញលក់នៅលើទីផ្សារនាចន្លោះខែ មីនា-មិថុនា ឆ្នាំ២០២២៕
