[ទីផ្សារបរទេស] ក្រុមហ៊ុនជប៉ុន Nissan បានប្រកាសថាខ្លួននឹងមិនប្រកាសចេញរថយន្តម៉ូដែលថ្មី ដែលប្រើថាមពលប្រេងឥន្ធនៈសុទ្ធចាប់ពីឆ្នាំ២០២៣ខាងមុខ ដោយក្រុមហ៊ុនមានផែនការពង្រីកជម្រើសរថយន្តអគ្គិសនីជាមួយការប្រកាសចេញផលិតផលថ្មីចំនួន៦ ចាប់ពីឆ្នាំ២០២២នេះ។
Nissan មានមហិច្ឆតាចង់ឲ្យ ៧៥% នៃចំនួនលក់រថយន្តនៅអឺរ៉ុប មានរួមបញ្ចូលដោយរថយន្តប្រើថាមពលអគ្គិសនីនៅត្រឹមឆ្នាំ ២០២៦ ខណៈគោលដៅធំដែលឡើងដល់ ១០០% គឺចង់សម្រេចឲ្យបាននៅត្រឹមឆ្នាំ២០៣០នេះ។ ក្រុមហ៊ុនបញ្ជាក់ទៀតថារថយន្តថ្មីទាំង៦ម៉ូដែល ដែលត្រៀមប្រកាសចេញនឹងមានចំណុចទាក់ទាញខុសគ្នា ដោយសារបច្ចេកវិទ្យាច្រើនប្រភេទដែលក្រុមហ៊ុនកំពុងអភិវឌ្ឍន៍។
កាលពីថ្មីៗនេះដែរ Nissan ទើបបានប្រកាសចេញរថយន្ត Juke ប្រភេទ Hybrid និងរថយន្ត Qashqai ប្រភេទ Hybrid សម្រាប់ទីផ្សារអឺរ៉ុប ខណៈដែលរថយន្តអគ្គិសនីសុទ្ធម៉ូដែល Leaf ក៏បានចេញស៊េរីថ្មីសម្រាប់លក់ជាស៊េរីឆ្នាំ២០២៣ផងដែរ។ ដោយឡែករថយន្តម៉ូដែល GT-R បានបញ្ឈប់ការលក់ជាផ្លូវការពីទីផ្សារអឺរ៉ុប៕
