រថយន្ត Porsche 911 Carrera T កំពុងតែទាក់ចិត្តអ្នកស្រលាញ់ចូលចិត្តរថយន្តយ៉ាងខ្លាំង ហើយឥឡូវនេះក្រុមហ៊ុន Porsche ក៏បានណែនាំម៉ូដែល 718 T ស៊េរីថ្មីផងដែរ។
រថយន្ត Porsche 718 T មានចំនួន ២ ម៉ូដែល គឺ Boxster និង Cayman ដោយបំពាក់ម៉ាស៊ីនចំណុះ ២,០ លីត្រ Turbocharged ទំហំ ៤ ស៊ីឡាំង បង្កើតកម្លាំងបាន ២៩៥ សេះ ជាមួយនឹងជម្រើសលេខដៃ ឬ អូតូ ៦ វគ្គ។
ម៉ាស៊ីនប៉ុននេះអាចអនុញ្ញាតឲ្យ 718 T ទាំង ២ ម៉ូដែលខាងលើស្ទុះពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេលមិនដល់ ៥ វិនាទីឡើយ។ ជាមួយគ្នានេះដែរ បើកាច់ចូល Sport Plus Mode វិញ វាប្រើពេលត្រឹមតែ ៤,៥ វិនាទី ហើយមានល្បឿនអតិបរមាដល់ ២៧៥ គីឡូម៉ែត្រក្នុងមួយម៉ោងឯណោះ។
រឹងតែពិសេស Porsche 718 T បានបំពាក់មុខងារ Porsche Active Suspension Management, Locking Rear Differential និង Torque Vectoring Technology ផងដែរ។ មិនតែប៉ុណ្ណោះ វាបានបំពាក់យ៉ាន់ទំហំ ២០ អ៊ីញ ដែលមានភាពរឹងមាំ និងធន់ចំពោះការបើកបរល្បឿនលឿនថែមទៀតផង។
ចំណែកឯផ្នែកខាងក្នុងវិញ មិនខុសពីរថយន្ត Porsche ដទៃទៀតប៉ុន្មានឡើយ ជាមួយនឹងការបំពាក់ដៃចង្កូត និងកៅអីបែបស្ព័រ ព្រមទាំងគ្រឿងបរិក្ខារយ៉ាងទាក់ទាញ និងប្រណីតបំផុត។ អ្វីដែលខុសប្លែកបំផុតនោះគឺ ការដកប្រព័ន្ធ Infotainment System ចេញ ដើម្បីកាត់បន្ថយទម្ងន់រថយន្ត ប៉ុន្តែអតិថិជនក៏អាចជ្រើសរើសដាក់វិញ (ជា Option) ដោយមិនអស់លុយផងដែរ៕
