ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនផលិតរបស់ចិនជាច្រើនបានចាប់ផ្តើមចូលប្រឡូកក្នុងទីផ្សាររថយន្តទំនើបៗ (Supercar) ជាមួយនឹងគំនិតនៃការរចនាប្លែកៗ។ ទោះបីនៅក្មេងខ្ចីក៏ដោយឧស្សាហកម្មរថយន្តចិននៅតែមានទំនុកចិត្តថារថយន្តទំនើបទាំងនេះអាចប្រកួតប្រជែងជាមួយ Ferrari និង Lamborghini នាពេលអនាគត ដោយសារការប្រើប្រាស់បច្ចេកវិទ្យាថ្មីៗ និងការរចនាប្លែកៗផងដែរ។
១. Farnova Othello: រថយន្តនេះគឺរថយន្តអគ្គិសនីដែលផលិតឡើងដោយក្រុមហ៊ុន Farnova Automotive។ វាបំពាក់ជាមួយម៉ូទ័រអគ្គិសនីចំនួន២ ដែលអាចផលិតកម្លាំងបាន ១ ៨៣៥សេះ និងមានតម្លៃ ២៨៨ ០០០ដុល្លារ។
២. Hongqi S9: ត្រូវបានផលិតឡើងក្រោមការសហការណ៍គ្នារវាងក្រុមហ៊ុន Silk EV និង FAW និងត្រូវបានបង្ហាញខ្លួនជាផ្លូវក្នុងកម្មវិធី Milan Design Week ក្នុងឆ្នាំ២០២១។ វាបំពាក់ជាមួយម៉ាស៊ីនចំណុះ ៤,០លីត្រ V8 មានកម្លាំង ៨៥០សេះ ផ្គួបជាមួយម៉ូទ័រអគ្គិសនីចំនួនពី មានកម្លាំង ៥៣០ និងមានកម្លាំងសរុប ១ ៤០០សេះ និងមានតម្លៃ ១,៥លានដុល្លារ។
៣. BAC Mono One: រថយន្តនេះត្រូវបានផលិតឡើងត្រឹមចំនួន ៣គ្រឿងប៉ុណ្ណោះ ជាមួយការប្រើប្រាស់គ្រឿងបរិក្ខាប្រភេទកាបូន។ រថយន្តនេះមានតម្លៃ ២០៥ ៩៤១ដុល្លារ ដោយដំណើរការដោយម៉ាស៊ីនចំណុះ ២,៥លីត្រ ទំហំ ៤ស៊ីឡាំង មានកម្លាំង ៣០៥សេះ និងអាចរត់ស្ទុះពីល្បឿន ០-១០០គ.ម/ម៉ ប្រើពេល ២,៨វិនាទី។
៤. BAIC Arcfox-7: វាគឺជារថយន្តអគ្គិសនីដំបូងនៃក្រុមហ៊ុនផលិតរថយន្តរបស់ប្រទេសចិន ដែលបានបង្ហាញចេញលក់ដំបូងកាលពីឆ្នាំ២០១៦ ក្នុងកម្មវិធីតាំងបង្ហាញរថយន្ត Beijing Motor Show ជាមួយតម្លៃ ៦០០ ០០០ដុល្លារ។ រថយន្តនេះបំពាក់ជាមួយម៉ូទ័រអគ្គិសនីចំនួន ៣ អាចផលិតកម្លាំងបាន ៦២០សេះ និងអាចបើកបរបានចម្ងាយ ២៩៩គីឡូម៉ែត្រនៅពេលសាកភ្លើងពេញម្តង។
៥. Techrules TREV: រថយន្តនេះត្រូវបានផលិតឡើងដោយក្រុមហ៊ុនទើបចាប់ផ្តើមថ្មី Techrules ដែលបានបង្កើតឡើងក្នុងឆ្នាំ២០១៥។ វាដំណើរការដោយម៉ូទ័រអគ្គិសនីចំនួន៦ ដោយនៅផ្នែកខាងមុខមានចំនួន ២ និងខាងក្រោយចំនួន ៤ ដែលអាចផលិតកម្លាំងបាន ១ ០៣០សេះ និងមានសម្ថភាពអាចស្ទុះពីល្បឿន ០-១០០គ.ម/ម៉ ប្រើពេល ២,៥វិនាទី និងមានតម្លៃប្រហែល ១,៦លានដុល្លារ។
៦. Icona Vulcano Titanium: រថយន្តនេះត្រូវបានផលិតឡើងដោយក្រុមហ៊ុន Shanghai-based Icona ដែលជាក្រុមហ៊ុនមួយបង្កើតឡើងក្នុងឆ្នាំ២០១០។ រថយន្តនេះមានកម្លាំង ៦៨០សេះ និងអាចស្ទុះពីល្បឿន ០-១០០គ.ម/ម៉ ប្រើពេល ២,៨វិនាទី និងមានតម្លៃប្រហែល ២,៨លានដុល្លារ។
៧. Qiantu K50: ត្រូវបានបង្ហាញខ្លួនក្នុងកម្មវិធីតាំងបង្ហាញរថយន្ត Shanghai Auto Show ក្នុងឆ្នាំ២០១៥ និងបានឈានជើងចូលទីផ្សារសហរដ្ឋអាមេរិចនៅឆ្នាំ២០១៩ ជាមួយតម្លៃ ១១២ ៥០០ដុល្លារ។ រថយន្តនេះមានកម្លាំង ៣៧៥សេះ និងអាចស្ទុះពីល្បឿន ០-១០០គ.ម/ម៉ ប្រើពេល ៤,៦វិនាទី ។
៨. Windbooster Titan: រថយន្តនេះបំពាក់ជាមួយម៉ូទ័រអគ្គិសនីចំនួន ២ អាចផលិតកម្លាំងបាន ៥៤៤សេះ និងអាចបើកបរបានចម្ងាយ ៤០០គីឡូម៉ែត្រនៅពេលសាកភ្លើងពេញម្តង៕
