[ទីផ្សារបរទេស] ក្រុមហ៊ុន Tesla កំពុងតែកាក់កបឡើងវិញជាមួយការលក់លើទីផ្សារប្រទេសចិន ដោយផ្អែកតាមសមាគមន៍រថយន្តចិន បានបង្ហាញថាកាលពីខែមិថុនា Tesla អាចលក់រថយន្តបានសរុប ៧៨ ៩០៦គ្រឿង។
តួលេខខាងលើនេះគឺជាកំណើន ១៤៥% ធៀបនឹងខែឧសភា ហើយក៏ជាកំណើន ១៣៨% ផងដែរ បើធៀបនឹងខែមិថុនា ឆ្នាំមុន ហើយតួលេខនេះក៏បានយកឈ្នះកំណត់ត្រាចាស់ដែលសាងបានកាលពីខែធ្នូឆ្នាំ ២០២១ (លក់បាន ៧០ ៨៤៧គ្រឿង) ថែមទៀតផង។
អំឡុងពេលនៃការផ្ទុះកូវីដ១៩រលកថ្មីនៅប្រទេសចិន បានធ្វើឲ្យការលក់របស់ Tesla ប្រចាំខែមេសា ធ្លាក់ចុះនៅត្រឹម ១ ៥១២គ្រឿង ហើយក្រោយមកនៅខែឧសភា ក៏ចាប់ផ្ដើមល្អប្រសើរវិញ ដោយអាចលក់រថយន្តបាន ៣២ ១៦៥គ្រឿង។
រថយន្ត Tesla Model Y បានក្លាយជារថយន្តអគ្គិសនីលក់ដាច់ជាងគេរបស់ Tesla ដែលអាចលក់ចេញបាន ៥២ ៥៥៧គ្រឿង កាលពីខែមិថុនា កើនឡើង ៧៩៤,៦% ធៀបនឹងខែឧសភា និងកើនឡើង ៣៥២,១% ធៀបនឹងឆ្នាំមុន។ ចំណែក Tesla Model 3 លក់ចេញបាន ២៦ ៣៤៩គ្រឿង កើនឡើង ៥៦៧% ធៀបខែមុន និងកើន ៥៩,៥% ធៀបឆ្នាំមុន៕
